Ibi Nsabiyaremye yabitangaje ku itariki ya 30/1/2014 mu mahugurwa kuri « Ndi Umunyarwanda », abahagarariye abaturage mu tugari n’imidugudu yo mu Murenge wa Kinazi bagiriwe mu rwego rwo kubategura kuzasobanurira abatuye mu midugudu ibijyanye n’iyi gahunda.

Nsabiyaremye uyu ngo ni we na mama we wenyine basigaye mu muryango nyuma y’uko abandi bavandimwe bishwe mu gihe cya Jenoside. N’ubwo ibi yabitangaje mu gihe cy’amahugurwa kuri « Ndi Umunyarwanda », ngo yari amaze igihe abitekerezaho kandi yaranabyumvikanyeho na mama we.

Agira ati « njye na mukecuru wanjye ejo bundi twahoze tubiganiraho arambwira ati ‘ubundi se turaharanira iki ko ibi atari byo bidutunze ? Twagize amahirwe turarokoka, turangije natwe turihahira, mu isambu yacu turakora turazamuka’. Nubwo imbabazi batazidusabye, twiyemeje kuzitanga kubera ubuntu».

Na none, ngo ibi Nsabiyaremye yatangiye kubitekereza biturutse ku nyigisho bahawe n’umuryango Association Modeste et Innocent (AMI) bakaza kurema amatsinda y’ubumwe n’ubwiyunge na we ubu ayobora.

Aba ijana bose yababariye ngo bari bamurimo amafaranga agera ku bihumbi 260. Kandi ngo wasangaga umwe amurimo ibihumbi bibiri na magana atanu, undi bitatu magana abiri… Ngo hari n’abagera ku ijana bari baramusabye imbabazi mbere arabasonera.

Marie Claire Joyeuse