Mukandoli ubana n’abana be bane yari afite inzu yatangiye kubaka guhera mu 1994 ariko iramunanira.

Mu mpera z’umwaka ushize wa 2012 ngo haje abantu bamubwira ko bagiye gusenya iyo nzu yamunaniye hanyuma bamuzamurire indi y’amatafari ahiye , bayisakare, bayihome , bayikinge ndetse bamwubakire igikoni n’ubwiherero. Bakimubwira ko bagiye kumwubakira, ibyishimo ngo byaramurenze.

Ati: “Nahise nkoma mu mashyi ndavuga nti Imana ibahe umugisha rwose kuko jyewe nta bushobozi nari mfite, imvura yaragwaga ikadusanga aho turyamye n’abana, simbone aho nakugamisha umuntu, tukabyiganiramo n’abana, udukoresho no gucanamo nuko umuntu akabura ahantu yisanzurira”.

Bamubwiye ko nyuma y’amezi abiri inzu azaba yamaze kuyubakirwa ibyo kandi ngo ni ko byagenze. Ngo haje abanyamuryango batandukanye ba FPR Inkotanyi barasiza, haza abasirikari barangiza gusiza ikibaza, hakurikiraho urubyiruko, rutunda amabuye n’amatafari ndetse batangira no kubaka, mu mezi abiri inzu iba imaze kuzura.

Mukandoli ashimira Imana kubera iyo nzu y’amatafari ahiye n’inzugi z’ibirahuri. Ashimira na nyakubahwa Perezida wa Repubulika, Paul Kagame n’umuryango FPR Inkotanyi kubera ko ngo ibyo kubakira abatishoboye nta yindi Leta yigeze abona ibikora. Kubera iyo nzu yubakiwe, Mukandoli asanga yinjiye mu mwaka wa 2013 viziyo 2020 ngo yaramaze kuyigeramo.

Ati: “Nshingiye ku nzu nubakiwe, rwose jyewe mbona viziyo 2020 yarangezeho pe! Bitewe n’uko nari ndi muri nyakatsi nkaba narayivuyemo, ndi munzu nziza ihomye”.

Ubusanzwe Mukandoli yabaga mu kazu k’ibyumba bibiri yita Gitwekimwe cyangwa se Mazamwe. Yakabanagamo n’abana bane, udukoresho, ihene n’inkoko ndetse akaba ari na ho ateka.

Imvura ngo yaragwaga ikamunyagira ndetse yabona n’umushyitsi ntabone aho kumwakirira. Inzu yubakiwe ifite ibyumba bine n’uruganiriro. Ni inzu ifite agaciro ka miliyoni zigera kuri esheshatu z’amafaranga y’u Rwanda.

Malachie Hakizimana