Kuwa kuri uyu wa mbere tariki 7 Nzeli kugeza tariki 11 Nzeli 2015, Urwego rw’Umuvunyi rwatangiye igikorwa cyo guhura n’abakozi b’uturere rubakangurira ubu buryo, mu rwego rwo kubaburira ko ruswa yahinduye isura.

Mugeni Cecile, umukozi w’uru rwego yatangarije abakozi b’akarere ka Nyarugenge bahuye kuri uyu wa kabiri, ko mu batanga ruswa ngo hari abayitanga mbere y’igihe, serivisi bakazisaba nyuma.

Yagize ati “Ikigaragara ni uko ruswa itangwa mu buryo butandukanye; hari ushobora kuba yayitanga mbere yo kugusaba serivisi, kimwe nk’uko hari n’abayitanga nyuma; ibyo byose ni ruswa kandi amategeko abihana kimwe.”

Urwego rw’Umuvunyi rwatangaje ko rwahisemo abakozi mu turere n’imirenge bahura n’abaturage benshi; hari abashinzwe irangamimerere mu mirenge, abashinzwe imiyoborere myiza mu turere, ba Noteri n’abakozi b’inzu z’ubutabera (MAJ).

Hari n’abapolisi bashinzwe umutekano wo mu muhanda, abahagarariye Urubyiruko n’abagore, ababaruramari mu turere ndetse n’abahagarariye amakoperative.

Bamwe mu barimo guhugurwa bavuze ko bigoye gutandukanya imitangire ya ruswa n’umuco nyarwanda ngo wahozeho wo gushimira ‘uwakugiriye neza’; ariko abandi babyamaganye bavuga ko ubu ari ubundi buryo bwo gushyigikira ruswa.

Gacenderi Christophe, ushinzwe irangamimerere n’ubunoteri mu murenge wa Mageragere, yagize ati “Ku rwego nkorera sindahura n’abashaka kumpa ruswa mbere yo kugira icyo mbakorera, ariko na nyuma ntayo nakwakira kuko nzi ko atari ubunyangamugayo.”

Abakozi b’Urwego rw’Umuvunyi barimo kuzenguruka mu turere twose tugize igihugu, bahugura abantu ku mikorere n’ububasha by’urwo rwego, uburyo abo bakozi bagomba kwigengesera kugira ngo batagwa mu mutego wa ruswa, ingaruka zayo n’uruhare rw’abahugurwa mu gukumira no kurwanya ruswa.

Simon Kamuzinzi