Urubyiruko rwo muri Afurika rwigishijwe gahunda yo kwigira

20-12-2013 - 09:15' | Ibitekerezo ( 3 )

Urubyiruko ruvuye mu bihugu bitandukanye by’Afurika rwumvise gahunda zijyanye no kwigira cyangwa kwishakamo ibisubizo Abanyarwanda bagenderaho, bamwe muri bo bakaba bemeje ko kumenya izo gahunda bizabafasha kurwanya ubukene no guharanira amahoro mu bihugu byabo.

“Nta kindi gihugu twasanze gifite ubunararibonye mu bijyanye no kwishakira ibisubizo bivuye mu baturage ubwabo nk’u Rwanda”, nk’uko byatangajwe n’Umuyobozi w’impuzamashyirahamwe y’abanyeshuri biga za kaminuza muri Afurika (AASU), Umunya-Sudani Mohamed Salah Ahmed.

Yishimiye uburyo Abanyarwanda bishyiriyeho inkiko Gacaca, Umushyikirano, Agaciro Development Fund, Umuganda, Itorero, gahunda ya mudasobwa kuri buri mwana, Girinka, Ubudehe,…, akavuga ko iyi ari inzira urubyiruko rwakoresha mu kurwanya ubukene no kubaka amahoro mu bihugu byabo.

Urubyiruko ruvuye hirya no hino mu bihugu bya Afurika, ruteraniye mu nama i Kigali.

Umuryango wa International H.O.P.E Week uharanira iterambere n’uburezi nawo wafatanyije na AASU mu gukangurira urubyiruko rw’Afurika kuza kwigira ku Rwanda. Hawa Dème Sarr, Umunya-Mali uwukuriye, ngo yatangajwe n’amahuriro yiswe Rwanda Day Umukuru w’igihugu w’u Rwanda ahuriramo n’Abanyarwanda hirya no hino ku isi, asaba ko abandi bamwigiraho.

Hawa yagize ati: “Mu rubyiruko rwa Afurika dukwiye kwanga ibidutandukanya aho twaba hose ku isi, nta kuvuga ngo aba bavuga Igifaransa, aba bavuga Icyongereza, abandi ngo n’aba-espagnol, ibyo ntibidufasha kubaka ubumwe n’amahoro.”

Mu baganirije urubyiruko, harimo bagenzi babo bageze ku bikorwa by’indashyikirwa bakiri bato. Urubyiruko rw’Afurika rusabwa kwibyazamo impano rufite, bagahimba kandi bakihangira imishinga ibateza imbere, babihereye ku mahirwe babona hafi yabo, nko kwitabira ubuhinzi, ikoranabuhanga, ubukerarugendo no gucuruza ibyo bejeje mu mahanga anyuranye.

Abageze ku bikorwa by'indashyikirwa bakiri bato batanze ibiganiro ku rubyiruko, bajya inama ko nabo bagifite amahirwe yo kwiteza imbere.

Bakurikiranye kandi ibiganiro bijyanye n’imiyoborere myiza nko kwishakira ibisubizo bahereye ku byo bafite iwabo, uruhare rw’abagore n’urubyiruko ndetse no kubaka umuco w’amahoro.

Kumenya izi gahunda, urubyiruko rukazibyazamo ibikorwa n’indangagaciro bagenderaho, ngo byafasha abari mu bushomeri kuva mu bukene, kandi bakageza ibihugu byabo ku miyoborere myiza, nk’uko Ministiri w’uburezi, Dr Vincent Biruta, yabisobanuye.

Inama yiswe Africa Youth Summit izamara iminsi ine guhera ku wa gatatu tariki 18/12/2013, ihuje urubyiruko ruturuka mu bihugu by’u Rwanda, Uganda, Tanzania, Burundi, Kenya, Sudani y’epfo, Sudani, Mali, Senegal, Afurika y’epfo, Liberia, Gabon, Mauritania, Algeria, Cameroun, Ghana, Botswana, Niger, Zimbabwe, Nigeria, Zambia, Malawi, Togo, Burkina Faso na Ethiopia.

Simon Kamuzinzi