Ibibazo byinshi bikurura amakimbirane bitangirira mu basheshe akanguhe, mbere y’uko bisakara mu rubyiruko; nk’uko byatangajwe na bamwe muri urwo rubyiruko rusaga 97 rwashoje amahugurwa ajyanye no kwhangira imirimo mu rwego rwo kwirinda amakimbirane.

John Mugema ukomoka mu karere ka Gatsibo wanakoze umushinga wo gukora ubukangurambaga mu baturanye, bakangurirwa kwirinda amacakubiri, avuga ko aho bageze hose basangaga urubyiruko arirwo rwumva ubwiyunge kurusha abakuze.

Ati “Amakimbirane ashingiye ku butaka n’imitungo niyo aza imbere mu bitanya Abanyarwanda kandi usanga agaragara mu bantu bakuze. Aho twageraga hose nko mu mashuri wasangaga urubyiruko arirwo ruhita rumva ibyo twigishaga”.

Albert Nzamukwereka, uhagarariye umuryango Never Again Rwanda, wafatanyije n’umuryango International Research and Exchanges Board (IREX) mu gushyira mu bikorwa aya mahugurwa, nawe yemeza ko urubyiruko ruhangayikishijwe n’umurimo kurusha uko rwakwishora mu makirmbirane.

Agira ati: “Icya mbere dukorera uru rubyiruko cyane cyane urutarize ni ukuruhugura mu myuga ubundi tukarushakira icyo gukora nk’amamashini yo kudoda kandi ugasanga biteza imbere.”

Nzamukwereka avuga ko ibyo byaberetse ko guha umuntu utangiye kwikorera amafaranga macye aribyo bimufasha kurusha uko wamutangiza kuri menshi.

Igihe u Rwanda rugezemo si icyo kwigisha urubyiruko kwirinda amakimbirane gusa, kuko rugumye mu bucyene ntacyo byamara. Iyi ngo niyo mpamvu urubyiruko rugomba guhabwa ubumenyi n’ubushobozi; nk’uko uhagarariye umuryango Never Again Rwanda abyemeza.

Uru rubyiruko rwigishijwe guhanga imishinga iganisha ku kwiteza imbere ariko ikanafasha abaturage muri rusange.

Emmanuel N. Hitimana