Minisitiri Mushikiwabo avuga ko bibabaje kuba Leta ya Kongo yahisemo kujya mu bitangazamakuru ikemeza ko u Rwanda rufite uruhare mu ntambara ibera muri Congo kandi ibihugu byombi byari birimo gutegura gusuzuma ibyanditswe muri raporo ishinja Leta y’ u Rwanda gufasha abarwanya Leta ya Congo; nk’uko bigaragara mu itangazo rya Minisiteri y’ububanyi n’amahanga ryasohotse tariki 09/06/2012.

Minisitiri Mushikiwabo yabitangaje asubiza umuvugizi wa Leta ya Congo Lambert Mende wagiye kuri television ya Congo akemeza ko hari abarwanyi babarirwa mu magana batorejwe mu Rwanda biryo u Rwanda rukaba rufite uruhare mu mutekano mucye uri muri Congo.

Akoresheje urubuga rwa Twitter, Umuvugizi wa Leta y’u Rwanda yahise asubiza ko bitangaje kuba Leta ya Kongo yaguye mu kinyoma aho kureba abaturage batuye mu burasirazuba bwa Congo bari guhangayikira muri iyi ntambara mu gihe abashinzwe kugarura amahoro batashoboye kubigeraho.

Minisitiri Mushikiwabo yagize ati “Twabisubiyemo inshuro nyinshi ko nta ruhare dufite mu bibera muri kiriya gihugu kandi ntabihamya bihari. Kuba Leta ya Congo nayo ibigendeyeho mu byukuri biteye ikibazo umuturanyi wayo w’u Rwanda”.

Kuva 2009 u Rwanda na Kongo byafatanyije mu guhashya imitwe iteza umutekano mucye yihishe mu mashyamba ya Congo. Intambara ibera muri Congo imaze gukura mu byabo abaturage bagera ku bihumbi 100; mu Rwanda hamaze guhungira abagera ku 11500.

Mu minsi ishize umuryango w’abibumbye uherutse gusohora icyegeranyo hishinja u Rwanda gutera inkunga abigometse ku butegetsi muri Kongo ariko u Rwanda rwacyamaganiye kure ruvuga ko icyo cyegeranyo kigamije gutera umwuka mubi hagati y’ibihugu byombi.

Sylidio Sebuharara