Iyi mihango yayobowe na Musenyeri Alexis Habiyambere wari usanzwe areberera Diyosezi ya Ruhengeri kuko itari ifite umushumba mu gihe cy’imyaka irenga 4.

Iyimikwa rye ni imihango ijyanye n’amagambo amuvugirwaho. Aryamye yubitse inda imbere y’abasenyeri batatu (Mgr Alexis Habiyambere wa Nyundo, Mgr Thadeo Ntihinyurwa wa Kigali na Mgr Simaragde Mbonyintege wa Kabgayi ari nawe uyoboye Inama y’Abepiscopi), uwari Padiri Harolimana Visenti yavugiweho amagambo anakorerwaho ibimenyetso, ahabwa ibiranga ubusenyeri birimo ingofero z’ubwoko bubiri zabugenewe n’inkoni y’ubushumba nk’uko biteganywa na Kiliziya Gatolika.

Ibi byaje nyuma yo kwerekana no gusomerwa mu ruhame ibaruwa ya Papa Benedigito wa XVI yemeza ko ariwe wamuhisemo.

Nyuma yo kuramburirwaho ibiganza n’abasenyeri 19 bose bari bitabiriye uyu muhango no guhabwa ibi bimenyetso, abapadiri bose ba Diyosezi, abera n’abirabura bose bakoze umuhango wo kumuyoboka buri wese aza agashyira ibiganza mu bya Musenyeri.

Musenyeri Harolimana ahabwa impano.

Nyuma y’igitambo habayemo amagambo anyuranye ay’abayobozi ba Kiliziya ku nzego zitandukanye ndetse n’ijambo ray Minisitiri w’Intebe, Dr Pierre Damien Habumuremyi.

Ubwo yamuhaga ikaze n’imirimo mishya, uwahoze ayobora by’agateganyo iyi diyosezi Musenyeri wa Nyundo, Alexis Habumuremyi, amaze kwibutsa amateka yayo, yibanze ku gushimira cyane abakirisitu ba Diyosezi ya Ruhengeri ubwihangane bagaragaje n’ubufatanye berekenye igihe batari babone uyu mushumba.

Musenyeri Thadeo Ntihinyurwa, Arkipepiscopi wa Kigali, yibukije umushumba mushya ibyo kiliziya Gatolika y’u Rwanda imutezeho: “Kuyobora no gufatanya n’abandi bakirisitu kuba abakozi beza mu murima w’imizabibu”.

Yamuhamagagariye kurushaho kubanisha neza abantu mu kuri n’ubuvandimwe cyane yita ku bakene, abaciye bugufi n’abandi batagira kivurira”.

Umushumba mushya wa Diyosezi ya Ruhengeri yibanze ku kwerekana ibyo agiye gukora yifashishije ikirangantego n’intego ye “ Videmus stellam eius” biri mu kilatini bivuga ngo “twabonye inyenyeri ye”. Ikirangantego cye cyirimo ifi iri mu mazi, ndetse n’iyo nyenyeri, bisobanura ko Yezu yaje aje gucungura abantu, ko yababereye urumuri.

Musenyeri Harolimana ari gutanga isengesho rye.

Ibi yabisanishije n’umwuka uva mu mazi iyo izuba rimuritse bigatanga imvura ituma abantu babaho, bakagira ubuzima bwiza. Agendeye ku nzego za Kiliziya guhera kuri Paruwase kugera ku miryango remezo, afatiye ku byo abamubanjirije bakoze, Musenyeri Harolimana yiyemeje kurushaho guteza imbere Diyosezi ya Ruhengeri n’abakiristu bayo barenga gato ibihumbi 500.

Ibi ngo azabigeraho ashinga amaparuwasi mashya abafatanije n’abakiristu kandi akomeza gushyigikira ibikorwa byiza. Nk’uko inyenyeri yirukana umwijima n’ibikorwa bibi, nawe yiyemeje gukora ibikorwa bizarushaho kuzamura abakiristu n’Abanyarwanda muri rusange. Ati “igihe ni iki, twubake ibyiza, twubake ibiramba dushingiye ku kuri detere imbere”.

Ministre w’Intebe, Dr Pierre Habumuremyi, wari uhagarariye Perezida wa Repubulika utashoboye kuboneka, yashimiye Kiliziya Gatolika ku bw’ibikorwa byinshi by’intagereranywa ikora bituma Abanyarwanda batera imbere yibanze ku burezi, ubuvuzi n’izindi nzego.

Minisitiri w’Intebe Pierre Damien Habumuremyi avuga ijambo.

Ashimangira ibyari byavuze na Guverineri w’Amajyaruguru Bosenibamwe, wagaragaje uruhare rudasubirwaho Diyosezi yagaragaje bigatuma iyi ntara iba n’iya mbere mu kurwanya ubukene, Ministre w’intebe yabwiye Musenyeri mushya wa Ruhengeri ko uruhare rwe rukenewe n’ubwo hari byinshi byamaze kugerwaho.

Yamubwiye ko umuganda we ukenewe mu kurushaho kubaka ubwizerane mu Banyarwanda, kubajijura no kurushaho kubateza imbere binyuze muri gahunda za Guverinoma zinyuranye zigamije gukura Abanyarwanda mu bukene, kwitabira kwibungabungira umutekano, ubwisungane mu kwivuza, kuboneza urubyaro n’ibindi.

Bamwe mu bihayimana bari bitabiriye umuhango.

Diyosezi ya Ruhengeri yavutse tariki 20/10/1960, ubu ifite Paruwasi 11 zibarirwamo abaturage barenga gato ibihumbi 500. Musenyeri Visenti Harolimana abaye uwa 5 nyuma ya Mgr Manyurane Bernard, Mgr Joseph Sibomana, Mgr Phocas Nikwigize na Musenyeri Kizito Bahujimihigo wimuriwe muri Diyosezi ya Kibungo muri 2007 ari bawo baherukaga umushumba.

Umuhango w’uyu munsi wari witabiriwe n’abakirisitu banyuranye bavuye imihanda yose y’igihugu ariko cyane cyane aba Diyosezi ya Ruhengeri buzuye stade bakanasaguka. Hari abapadiri benshi barenga nka 200, abasenyeri 19 barimo 9 bavuye Burundi, 1 wavuye Uganda n’undi wavuye muri Reubulika Iharanira Demokarasi ya Kongo.

Jean Claude Hashakineza