Mu mafaranga y’u Rwanda arenga ho gato miliyoni 718 yegukanwe n’ibi bigo byose, Kigali Today yegukanyemo miliyoni 63 kubera umushinga wo kwigisha abantu ibijyanye no gukoresha amajwi ya Radiyo, nk’uko bitangazwa na Jean Charles Kanamugire, umuyobozi wa Kigali Today.

Kanamugire uyobora Kigali Today ashyikirizwa igihembo batsindiye.

Yagize ati: “Impamvu twahisemo uyu mushinga Kigali Today ni ikigo gisanzwe gikora itangazamakuru turabikora kandi twanabikoze ku bakozi bacu twahuguye n’abandi bantu bose babidusaba. Niho hantu turi twemera ko hazagira n’uruhare mu iterambere ry’igihugu.”

Kanamugire yatangaje ko buri kwezi iki kigo, gisanzwe gifite Radiyo ikorera ku murongo wa Internet n’urubuga rwa internet rwa www.kigalitoday.com, kizajya gihugura abantu bagera kuri 30 mu gihe cy’amezi atatu.

Abandi bafashe amagambo bashimiye WDA kuba yabashije kubaha amahurirwe yo guteza Abanyarwanda imbere cyane cyane urubyiruko muri rusange. Batangaje ko iyo nkunga igiye kubafasha kugira icyo bahindura mu bumenyingiro.

Uhereye ku ruhande hirya, Gasana uyobora WDA, Minisitiri Nsengiyumva, Umuyobozi wa Banki y’Isi n’Umuyobozi w’umushinga wo guteza imbere imyuga muri WDA.

Ibi kandi byanagarutsweho na Alexis Nsengiyumva, umunyamabanga wa Leta ushinzwe guteza imbere ubumenyingiro. Yasabye abahawe aya mafaranga kuyakoresha neza bakazirikana ko ari inguzanyo Leta izishyira n’ubwo bo itazayibishyuza.

Yavuze ko bagomba kujya bibuka ko nibayahombesha ari Abanyarwanda bazaba bashyize mu bukene, kuko Leta izaba isabwa kwishyura inkunga itaragize icyo itanga. Ayo mafaranga yatanzwe ku nguzanyo ya Banki y’Isi.

Jerome Gasana, umuyobozi wa WDA, yatangaje ko ikigo ayoboye kizakomeza kongera umubare w’ibigo bigenerwa aya mafaranga mu gihe ibyayahawe mbere bizaba bigaragaza umusaruro n’uruhare rwabyo mu guteza imbere ubumenyingiro.

Ati: “Icyo dushyize imbere si uguhugura ahubwo no ukugira ngo ba bantu bamaze guhugurwa bahite batangira gushinga inganda zabo batangire guhanga imirimo . ni icyo turi gushyira imbere kandi turabona biri gutanga umusaruro.”

Iki gikorwa cyabaye kuri uyu wa Kabiri tariki 25/06/2013, cyari kibaye ku nshuro ya kabiri. Ubushize WDA yari yahaye ibigo byitwaye neza mu gutanga imishinga amafaranga agera kuri miliyoni 595.

Abatatsindiye ni abatanze imishinga iganisha ku gutunganya abantu ku bwiza, Kubaka, ICT, Gukanika, Ubuhinzi, Ubwubatsi bw’ibisenge, gusana, Amashanyarazi, Kwakira neza abakiriya, ubugeni n’ubukorikori.

Emmanuel N. Hitimana