Umusaza Sentore Athanase arashyingurwa kuri uyu wa mbere

26-03-2012 - 12:03' | Ibitekerezo ( )

Nyakwigendera Sentore Athanase, se wa Masamba Intore, arashyingurwa kuri uyu wa mbere tariki 26/03/2012. Imihango yo kumusezeraho iratangira saa sita z’amanywa.

Misa yo kumuherekeza irabera kuri Paruwasi Regina Pacis i Remera nyuma yaho umurambo we urashyingurwa mu irimbi ry’i Rusororo; nk’uko byatangajwe na Masamba Intore.

Abaherekeza umusaza Sentore baramuherekeza baririmba mu nganzo yabatoje mu buryo bwo kumuha icyubahiro kimugomba nk’intore.

Masamba Intore yagize ati “Data atabarutse gitore, Imana imwakire mu bayo. Ni Intore nkuru isanze izindi ntore nka Munzenze, Minega, Butera bwa Nturo, Bwanakweli, Nyamucakena n’abandi.”

Umusaza Sentore yitabye Imana tariki 21/03/2012 mu bitaro byitwa Fortis Hospital biri Mumbai mu Buhinde azize indwara y’umutima. Sentore Athanase atabarutse ku myaka 78; assize abana 8.

Marie Clemence CYIZA UWIMANIMPAYE