Bimwe mu bikorwa by’indashyikirwa Sergeant Mujawamariya yakoze harimo gufasha impunzi n’abaturage b’aho yakoreraga bagashobora kwikorera imishinga iciriritse ibateza imbere irimo kudoda imyenda, gukora amasabuni ndetse no kwigisha ururimi rw’icyongereza abana n’abakuze.

Sergeant Mujawamariya yagize ati,“Intego yanjye kwari kugira icyo nakora cyiyongera ku nshingano zo kugarura amahoro cyateza imbere imibereho y’abaturage b’aho nakoreraga ndetse na bagenzi bajye. Nageze ku mpunzi n’abaturage benshi mu gace k’amajyepfo nakoreragamo maze dufatanyije dushyiraho ingamba z’uko twateza imbere imibereho yabo. Bamwe muri bo ubu bazi gukora amasabuni, kudoda imyenda no kuvuga icyongereza".

Mubyo yakoze na none harimo kwigisha abaturage kwirinda indwara ya Ebola, yazahaje bimwe mu bihugu byo mu burengerazuba bw’umugabane wa Afurika.
Akoresheje ubunararibonye afite mu buvuzi n’ubushakashatsi yakoze kuri ubu burwayi, Sergeant Mujawamariya yigishije impunzi n’abaturage b’aho yakoreraga uko bufata n’uko babwirinda.

Yagize ati “Ebola yahungabanyije umugabane wa Afurika muri rusange.N’ubwo itageze muri Darfur, ntibyabujije abaturage b’aho kugira icyoba ko ishobora kuhagera. Nabigishije uko bayirinda n’uko bayirwanya mu gihe ihadutse”.

Commissioner Hester Adriana Paneras ukomoka muri Afurika y’epfo wayoboraga Sergeant Mujyawamariya yamushimiye kubera umurava yagaragaje mu guhuza no gutunganya ibikorwa n’imishinga bigamije kurwanya ihohoterwa rishingiye ku gitsina ari nako yateguraga indi ijyanye no gukumira no kurwanya ibyaha.

Commissioner Paneras yagize ati “Imirimo ya Mujawamariya ni indashyikirwa. Imishinga ye yagize ingaruka nziza ku mibereho y’impunzi n’abaturage mu gace yakoreragamo ndetse na bagenzi be bakoranaga”.

Sergeant Mujawamariya ni umwe mu bapolisi b’u Rwanda mirongo itatu bagarutse mu gihugu ku itariki 11 Mutarama 2015 bavuye mu butumwa by’amahoro muri Sudani y’amajyepfo na Darfur bari bamazemo umwaka.

Umuyobozi w’ishami rya Polisi y’u Rwanda rishinzwe ibikorwa byo kubungabunga amahoro, ACP Jimmy Hodari, yashimiye Sergeant Mujyawamariya kimwe na bagenzi be agira ati “Abapolisi b’u Rwanda bari mu butumwa bw’amahoro bakora kinyamwuga ari na ko barushaho guhesha u Rwanda isura nziza mu mahanga".

U Rwanda ruri mu bihugu bitanga umubare munini w’abapolisi b’igitsinagore bajya mu butumwa bwo kubungabunga amahoro.

U Rwanda kandi ruri mu bihugu bike byagize uruhare mu gutegura no kunononsora umwanzuro wa 1235 w’akanama k’umuryango w’abibumbye gashinzwe umutekano usaba ibihugu kwongera uruhare w’abagore mu bikorwa byo guhoshya intambara, kugarura amahoro no gushyira gahunda z’uburinganire muri gahunda zo kugarura amahoro.

Iyi nkuru tuyikesha Polisi