Iyi nkuru y’incamugongo yababaje bikomeye abanyeshuli bari basanganwe bigana mu mwaka wa mbere w’ishami ryigisha iterambere ry’icyaro ( Developement Rural ) kubera imbuto nziza zirimo kubana n’abandi neza mu mibereho ye ya buri munsi.

Urupfu rwa Muteteri Léonille rukirama kumenyekana imbaga y’abantu benshi barimo abo mu muryango we n’inshuti ze n’ababyeshuli ba INILAK bahise bajya gukoranira aho uwo mubyeyi yari atuye mu mujyi wa Nyanza batangira kuganirira abatari bamuzi imico myiza yamuranze muri ubu buzima abandi kwihangana byabananira bagaturika bakarira.

Abanyeshuli bari basanganwe na Muteteri bigana mu ishuli rimwe basubiramo uko babanaga nawe muri aya magambo bagira bati: “ Yari icyitegererezo mu mibanire myiza y’abantu n’abandi kandi akagira umurava mu myigire ye” abandi bamuririra bagira bati: “ Mu ishuli ntituzongera kugira umurava nk’uwo yaduteraga”.

Umwe muri bo arira amarira menshi yagize ati: “ Niba ijuru ribaho Mana uzarimuhe kuko Muteteri yakoraga nk’urikorera agakunda abantu bose atarobanura ku butoni”.

Abenshi muri bo bahurizaga cyane ku rugwiro no gukunda Imana byaranze uwo mubyeyi ubwo yari akiri mu buzima bwo kuri iyi si.

Muteteri yitabye Imana azize indwara y’umwingo yakundaga kujya kwibagisha mu bitaro bitandukanye birimo n’ibyitiriwe Umwami Fayizali mu mujyi wa Kigali ari naho yarangirije urugendo rwe ku isi.

Kalisa Edouard, Prezida w’umuryango w’abanyeshuli biga muri INILAK Nyanza Campus yahise atangaza ko biteguye guherekeza umurambo wa Mutete Leonille mu cyubahiro cyinshi kimugenewe.

Abivuga atya: “ Abanyeshuli tuzitoramo abazifatanya n’umuryango we n’inshuti mu muhango wo kumusezeraho bwa nyuma.” Umurambo wa Mutete Leonille uzashyingurwa tariki 17/07/2012 saa munani z’amanywa mu irimbi rya Rusoro mu mujyi wa Kigali.

Muteteri Léonille apfuye afite imyaka 40 yubatse kandi yari umubyeyi w’abana bane nk’uko bitangazwa n’abari inshuti ze magara.

Jean Pierre Twizeyeyezu