Patrick Kanyamibwa yagiye agaragara mu bikorwa binyuranye bifite aho bihuriye n’Iyobokamana haba mu gukorana n’abahanzi ndetse n’ikompanyi zifite ibikorwa bifasha abahanzi, amakorali n’ibindi ndetse n’ubutumwa bwiza.

Ubwo twavuganaga bwa nyuma tumubaza ku bijyanye na Groove Awards ari nawe wari ushinzwe iby’itangazamakuru muri iki gikorwa, hari ku isaha ya saa kumi z’umugoroba zirenzeho iminota 26, akaba yanadutangarije ko yari ari mu kazi.

Umunyamakuru Patrick Kanyamibwa yakoraga mu bijyanye n’iyobokamana.

Mu kiganiro gito twagiranye ubwo twamubazaga ibijyanye n’ibikombe byifashishwa mu gutanga ibihembo muri Groove Awards yatubwiye ko atazi neza aho bikorerwa ariko ko ari muri Kenya bituruka atwemerera kuzadushakira amakuru arambuye kuri byo.

Uyu munyamakuru wagaragazaga ubwitange mu gufasha abahanzi n’amakorali baririmba indirimbo zihimbaza Imana, yitabye Imana azize impanuka ya moto ishobora kuba yabaye nyuma gato y’uko twavuganye ku murongo wa telefoni ubwo yatubwiraga ko ari mu kazi.

Patrick Kanyamibwa muri Groove Awards y’umwaka washize wa 2013.

Amakuru atugeraho aravuga ko iyi mpanuka yabereye ku Kimihurura hafi ya Cadillac. Abahanzi, abanyamakuru n’abandi bantu banyuranye bakomeje gutanga ubutumwa bw’akababaro banihanganisha umuryango we.

Yitabye Imana afite gusa imyaka 32 y’amavuko akaba asize umugore Jeanine Keza n’umwana umwe w’umuhungu witwa Kenzo Mugisha Kanyamibwa.

Patrick n’umuryango we ubwo yizihizaga imyaka 32 amaze avutse.

Patrick Kanyamibwa Yakoraga mu biganiro bya Gospel akaba yaramenyekanye by’umwihariko mu kiganiro “Gospel Time Show” ku Isango Star aho yabaga ari kumwe na mugenzi we Kwizera Ayabba Paulin. Yari amaze n’igihe kitari gito cyane akora kuri Lemigo TV mu kiganiro cy’iyobokamana. Imana ikomeze umuryango we, inshuti n’abavandimwe kandi nawe imuhe iruhuko ridashira.

Marie Clemence CYIZA UWIMANIMPAYE