Umuntu woga ari uko agiye mu misa gusa si uwo kwihanganirwa - Min Uwizeyimana

Uwizeyimana Evode Umunyamabanga wa Leta muri Minisiteri y’Ubutabera Ushinzwe Itegeko nshinga n’andi Mategeko, arasaba abaturage kwikosora bakava mu mwanda, asaba n’abayobozi b’amadini n’amatorero gufasha abakirisitu kuva mu mwanda, roho nziza igatura mu mubiri muzima.

Min Uwizeyimana Evode yasabye abanyamadini kwigisha abayoboke babo gukaraba no mu minsi itari ku cyumweru
Min Uwizeyimana Evode yasabye abanyamadini kwigisha abayoboke babo gukaraba no mu minsi itari ku cyumweru

Minisitiri Uwizeyimana akaba ari nawe ushinzwe kureberera akarere ka Gakenke, aragira ati “Umuntu usa nabi, umuntu woga ari uko agiye mu Misa gusa ntitwabyihanganira. Ariko ba Padiri mwanadufashije ko iyo aba bantu baje kubareba babanza koga, mwanadufashije bakajya boga iminsi yose aho koga ku cyumweru?.”

Koga no kugira isuku tubigire umuco rwose, abantu basa nabi ntabwo babereye uru Rwanda rwateye imbere. Ni mushikame duteze Gakenke imbere, duteze intara y’Amajyaruguru imbere n’Igihugu muri rusange. Umuntu ugira umwanda nta terambere yageraho, simwe njya numva muvuga ngo tugire ubukire? Byose bijyana n’isuku”.

Gatabazi JMV, Guverineri w’Intara y’Amajyaruguru, aburira abayobozi bo mu nzego z’ibanze ko ikibazo cy’umwanda mu baturage bayoboye, avuga ko nibatagira icyo bagikoraho bazafatirwa ibyemezo byanagera ku guhagarikwa ku kazi.

Yabitangarije mu Murenge wa Muhondo mu karere ka Gakenke, ahakomereje ubukangurambaga ku isuku, aho ubuyobozi bw’Intara n’Uturere tuyigize, bwihaye igihe kingana n’ukwezi, bwiyemeza gusura abaturage mu Mirenge yose bubakangurira kugira isuku.

Mu magambo yagarutsweho na Guverineri Gatabazi JMV, yababajwe n’umwanda ukabije abona mu ngo z’abaturage no mu myambarire yabo, avuga ko igihe kigeze ngo uwo mwanda ucike burundu.

Yagize ati “Urahura n’abana, wareba uko bambaye ukibaza niba ari abana bo mu Rwanda bikakuyobera. Wababaza bati uyu munsi ntitwagiye ku ishuri,urajya mu rugo ugasanga bituma mu misarani itindishije igiti kimwe, ibiti bibiri ukibaza uko umwana ujya muri uwo musarani azakura ameze. Azakura yumva ko uwo musarani ariwo ubereye umugabo”.

Guverineri Gatabazi avuga ko ahazajya hagaragara umwanda bizajya bibazwa ubuyobozi
Guverineri Gatabazi avuga ko ahazajya hagaragara umwanda bizajya bibazwa ubuyobozi

Aribaza impamvu umuntu agira umwanda yakora n’urugendo akageza ubwo anukira abagenzi agira ati “Tugire n’umuco wo kubwira abantu, niba asa nabi bimubwire, urava mu rugo wikarabiye ufata urugendo rwawe ukajya muri bus ukajyana n’umuntu udaheruka gukaraba, ugakora urugendo amasaha angahe akunukira ugasanga akubujije umutekano, waba usanzwe ufite inzoka mbi ukava muri bus inzoka munda zitangiye kuvuza aya Bahanda, abantu bakabyemera”.

Akomeza agira ati “Hari ingo nyinshi twagiye dusura, wabona aho umukobwa arara ukagira ngo ni mucyari, ibikweto bitakigira ibyabyo, ibibindi byamenetse, ibisafuriya byashaje, ibisahani byatobotse, ibyahi by’abana bambaye banagiye mu ishuri. Hari aho ugera mu dusantere ugasanga irangamuntu ni umwenda bambara, ukareba umugabo uti uyu ni kanaka, ukareba umugabo ishati yambaye ukaba wateraho ibishyimbo bikamera”.

Bamwe mu baturage bo muri uwo murenge baganiriye na Kigali Today, barahakana umwanda bashinjwa n’ubuyobozi, abandi bakemeza ko ibyo ubuyobozi bubashinja ari ukuri.

Umuturage utashatse kwivuga amazina yagize ati “ibintu by’umwanda twarabirwanyije, imisarani twarubatse, twambara imyenda ifuze, ibyo ni ukubenshya ni ukuduharabika. Guverineri yatubeshyeye nta mwanda ukiba muri Gakenke isuku ni tayari rwose”.

Niyomugabo ati “Oya Guverineri ni umuntu usobanutse ntabwo, aba abeshya, yaranize azi ubwenge. Iyo suku hari abatayigira rwose n’ubwo aribo bake”.

Hari kandi n’abavuga ko baterwa umwanda no gukora mu mishanga ya Leta bakamburwa, bikabaviramo kubura uburyo biyitaho.
Tuyishime Happiness ati “Umwanda dufite twabuze isabune, twe baratwambuye, twakoze muri VUP banga kuduhemba tumaze amezi atandatu bataduhemba, batwicishije inzara ibu nta sabune nta mituweri”.

Guverineri Gatabazi yavuze ko ubukangurambaga bwatangijwe ku itariki 5 Kanama 2019, bugomba gusiga abaturage bose bagaragaza isuku, bitakorwa abayobozi b’inzego z’ibanze bakabizira.

Agira ati “Urabona abana ku mihanda wareba imbyiro ku gatuza bikakuyobera, Nzongera kwicara ari uko isuku yabaye isuku, ntabwo naje hano ngo mbabwire ibi ari ugukina, mbivuze nshikamye kandi abayobozi bari hano mubyumva nibidakorwa birabagiraho ingaruka.Mubikore nibidakorwa mureke akazi dushake abashobora kubikora, ntabwo ari njye uzaza mu midugudu no mu tugari koza abaturage, murabikora nibyanga muveho”.

Ni ubukangurambaga bwatangijwe ku itariki 5 Kanama 2019, aho Ubuyobozi bunyuranye mu Ntara y’Amajyaruguru n’Uturere buzasura abaturage bo mu Mirenge yose igize iyo ntara, bubakangurura kugira isuku, ababirenzeho ngo bagafatirwa ibihano binyuranye.

MENYA UMWANDITSI

kigalitoday android app mobile

Ibitekerezo   ( 2 )

Nibyo rwose ibyo Ministre avuga ku isuku igomba kwitabwaho igahoraho ntibe iyo kujya mu misa no mu materaniro gusa
Roho nziza igomba kuba mu mubiri mwiza ndibwira ko Ministre yashakaga kubihuza n’ibyanditswe na Juvenal , Montaigne akabisubiramo bavuga ngo Mens sana in corpore sano. Bivuga ngo Roho nzima mu mubiri muzima.
Pierre de Courbertin we yongeyeho akandi ngo mens fervida in corpore lacertoso bivuga ngo Roho ikerebutse mu muniri ukaraze.
Ibyo bitekerezo ndibwira ko byerekezaga ku mikino.

Ibyerekeye kuzuka n’ubugingo nyuma y’urupfu, reka buri mukiristu agumane ibyo yemera.

sibomana yanditse ku itariki ya: 21-08-2019  →  Musubize

Minister aravuga ngo "Roho nziza igatura mu mubiri mwiza".Rwose abantu bakunda kwandika,ndabasaba ko mwamfasha tukaganira kuri Roho.Ngewe nk’umukristu,ndatanga igitekerezo nshingiye kubyo bible ivuga.Mu byukuri,nta hantu na hamwe bible ivuga Roho idapfa,ijya mu ijuru iyo dupfuye.Umuntu witwaga Platon utaremeraga Imana dusenga,niwe wahimbye ko mu mubiri wacu habamo Roho idapfa.Bible yo,ivuga ko iyo dupfuye,tujya mu gitaka,tukamera nkaho dusinziriye.Abapfuye bumvira Imana bazazuka ku munsi w’imperuka nkuko Yesu yavuze.Niba habaho Roho idapfa,ubwo Umuzuko ntacyo waba uvuze.Muli Umubwiriza 9,umurongo wa 5,havuga ko upfuye atongera kumva.None se wakitaba Imana gute kandi utumva?Dushake Imana cyane kugirango izatuzure kuli uwo munsi,aho kwemera abatubwira ko iyo dupfuye dukomeza kubaho.Ni ikinyoma.Abakunda kwandika mwansubiza mu magambo make.

munyemana yanditse ku itariki ya: 19-08-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.