Iyo nzu yatashwe ku mugaragaro tariki 08/12/2012 ubwo mu karere ka Burera hizihizwaga isabukuru y’imyaka 25 FPR-Inkotanyi imaze ivutse, yuzuye itwaye amafaranga miliyoni esheshatu n’ibihumbi 350. Akaba yarayubakiwe n’urubyiruko rwa FPR-Inkotanyi rwo muri Burera.

Iyo nzu irimo ibikoresho birimo ibitanda biriho matelas n’inzitira mibu, ndetse n’intebe n’ameza. Ibyo kandi biherekejwe n’ibikoresho byo mu gikoni ndetse na bimwe mu biribwa. Kuri ibyo hiyongera ho inka n’ikigega cyo gufata amazi ava ku nzu.

Nyirakaje ufite imyaka 82 y’amavuko, wari usanzwe uba mu nzu nto, isakaje amategura kandi ishaje, asobanura uburyo yishimiye icyo gikorwa.

Agira ati “Abayobozi baraje basanga ndi mu ishyamba, ndi kurara mu itaka, ndi kubura n’icyo ndarira…FPR-Inkotanyi aho inkuye, none ubu rwose ngeze mu nzu, ndishimye…ndumva nishimye mu mutima wanjye…”.

Uyu mukecuru w’umupfakazi afite abana b’impfubyi arera. Avuga ko abonye icyo azareresha izo mpfumbyi ze. Ngo kuba ari mu za bukuru, akaba abonye ahantu heza aba bizatuma agira amasaziro meza.

Dr Harebamungu Mathias, umunyamabanga wa Leta ushinzwe amashuri abanza n’ayisumbuye wayoboye umuhango wo gutaha iyo nzu yashimiye abanyamuryango ba FPR-Inkotanyi bo muri Burera bashyize Nyirakaje mu rwego rw’abishoboye, bakamukura ahabi bakamushyira aheza.

Yakomeje abasaba gukomeza gufasha uwo mukecuru mu kubungabunga ibyo byose bamufashije kuko ashaje kandi bakamufasha kurera abana bimpfubyi afite. Yongeye ho abasaba gufasha n’abandi batishoboye kugira ngo nabo bazamuke.

Norbert Niyizurugero