Izi mashini zirimo izitsindagira eshanu, izipakira eshanu, izicukura zikanasiza 16, izisanza zikanaringaniza eshanu, ndetse n’imodoka nini 30 zifashishwa mu bwikorezi bw’ibikoresho by’ubwubatsi (nk’itaka, isima, umucanga amabuye n’amatafari).

Izo mashini hamwe n’imodoka bigiye kwifashishwa ahanini mu guteza imbere Umushinga w’Umujyi wa Kigali wiswe ‘Kigali Infrastructure Project(KIP)’ ugamije kubaka ibirometero 215 bigize imihanda 57 hamwe n’ibiraro biyihuza.

Uyu mushinga wa KIP uri mu cyiciro cya kabiri cyawo (kuko hazakorwa ibyiciro bitandatu), watangiye mu mwaka ushize wa 2022, ukaba ugomba kuzarangira muri 2026.

Imashini n’imodoka byazanywe n’Ikigo Construck bifite agaciro k’amafaranga y’u Rwanda miliyari zirindwi(7) na miliyoni 300, bikaba byatashywe na Minisitiri w’Ibikorwa Remezo, Dr Ernest Nsabimana kuri uyu wa Gatanu tariki 10 Gashyantare 2023.

Dr Nsabimana avuga ko uretse umushinga wa KIP hari n’indi minini itegereje gukorwa n’imashini hamwe n’imodoka zaguzwe, harimo uw’imihanda izaba izengurutse Umujyi wa Kigali, ku buryo abava mu Ntara bajya mu zindi batazongera kwinjira mu Mujyi rwagati.

Dr Nsabimana ati "Umuntu uvuye mu Burasirazuba ageze i Kabuga abone umuhanda ashobora gucamo, niba uvuye mu Majyaruguru ugeze za Rulindo, ugomba kubona undi muhanda utaje i Kigali mu Mujyi rwagati ".

Ati "Uwo mushinga twakwita imikandara izengurutse Umujyi wa Kigali (Ring Roads), inyigo yawo mu gihe cya vuba iraza kuba irangiye."

Mu mihanda 57 irimo kubakwa muri Kigali (igize umushinga wa KIP) harimo kwagura uva i Remera kuri Prince House ukagera i Masaka, bitewe n’umubyigano ukabije ukunze kuwugaragaramo.

Minisitiri w’Ibikorwa Remezo akomeza avuga ko mu yindi mihanda izubakwa hanze ya Kigali harimo uva i Masaka n’uva ku mugezi w’Akagera ugana ku Kibuga cy’Indege cya Bugesera, ndetse n’umuhanda Base-Kidaho-Butaro (uzaba ureshya n’ibirometero birenga 60).

Dr Nsabimana akomeza asaba Ibigo bishinzwe kubaka Ibikorwa remezo kugura n’imashini zubaka ibiraro mu mazi, ndetse no gushyira imbaraga mu mutekano w’abantu n’ibintu.

Minisitiri w’Ibikorwa Remezo ashima ko NPD na Construck bifitiye igaraje ryabo rizajya risuzuma rikanakora imodoka mbere y’uko zishyirwa mu muhanda.

Minisitiri Nsabimana yashimye imashini n’imodoka nshya zaguzwe na Sosiyete Crystal Ventures ibinyujije muri NPD na Construck

Umuyobozi wungirije w’Umujyi wa Kigali ushinzwe Imiturire n’Ibikorwa Remezo, Dr Merard Mpabwanamaguru, avuga ko uyu mujyi usanzwe ufite kugeza ubu imihanda ya kaburimbo itarengeje ibirometero 560.

Avuga ko KIP ari wo mushinga wa mbere ukozwe wo kubaka ibirometero byinshi, aho imihanda y’igitaka izashyirwamo kaburimbo, hakaba imihanda mishya izahangwa ndetse n’isanzweho ya kaburimbo izajya yagurwa, ku buryo ahari ibisate bibiri hazashyirwa bine.

Ni umushinga Dr Mpabwanamaguru avuga ko witezweho guteza imbere Umujyi no kugabanya umubyigano w’ibinyabiziga byatumaga urujya n’uruza rw’abantu n’ibintu rugorana.

Umuyobozi Mukuru w’Ikigo NPD (cyabyaye Construck), Yves Nshuti, yizeza ko imashini n’imodoka zaguzwe zigiye kwihutisha imirimo ya KIP kugira ngo izasozwe ku gihe cyateganyijwe.

Ikigo Construck kimaze imyaka ibiri gikorera mu Rwanda, cyari gisanzwe gifite imashini 106 zikoreshwa mu bwubatsi bw’ibikorwa remezo, hamwe n’amakamyo manini 126.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2471 )