Minisitiri w’ibikorwa remezo Musoni James, wawufunguye ku mugaragaro, kuri uyu wa 15/9/2015, yasabye abaturage kubungabunga uyu muhanda kuko uje kubafasha ubuhahirane n’ibindi bihugu by’abaturanyi bikaborohera kugera ku iterambere.

Uyu muhanda Kigali - Gatuna ufite uburebure bw’ibirometero 78, ukaba wuzuye utwaye amafarana y’u Rwanda angana na miliyari 51 yatanzwe ku nkunga y’ibihugu bigize umuryango w’Ubumwe bw’Uburayi.

Asobanura icyo uyu muhanga ugiye kongera ku bukungu bw’igihugu, Minisitiri Musoni yagize ati “51% by’ibicuruzwa byinjira n’ibisohoka mu Rwanda binyura muri uyu muhanda, aka ariyo mpamvu wizeweho kongera ubuhahirane n’ibindi bihugu by’abaturanyi”

Abaturage baturiye uyu muhanda, na bo biyemeje kuwubyaza umusaruro, aho bemeza ko ubu bawugendamo neza kubera ko nta nzitizi bagihura nazo.

Zimwe mu mbogmizi bahuraga nazo uyu muhanda utaratunganywa, ni uko imodoka zahangirikiraga igihe zije kubapakirira imyaka, bigakoma mu nkokora ubucuruzi bwabo.

Niyonzima Charles yemeza ko aho uyu muhanda umariye gukorwa batangiye kujya bagira ubuhahirane n’igihugu cya Uganda.

Uyu muhanda kandi ngo woroheje ingendo kuko mbere bakoraga urugendo rw’amasaha abiri bava Gicumbi berekeza Kigali, ariko ubu bahakoresha isaha imwe gusa.

Ikorwa y’uyu muhanda kandi ryabafashije kujya bageza amata yabo ku makusanyirizo atangiritse kuko mbere wasangaga amata yabo yarangirikaga kubera kugenda mu muhanda mubi.

Neven Mimika, wari ihagarariye ibihugu bigize Ubumwe bw’Uburayi, yibukije abaturage ko umuhanda ufitiye akamaro n’akarere ka Afurika y’Uburasirazuba kuko woroheje ubuhahirane muri ibi bihugu.

Ibihugu bigize ubumwe bw’uburayi bikaba bigikomeje ibikorwa byo gufasha u Rwanda mu kubaka ibikorwa remezo birimo umuhanda uva Rusumo werekeza Kagitumba.

Ernestine Musanabera