Ibi minisitiri Musoni yabitangaje tariki 03/03/2014 mu nama mpuzabikorwa igamije kurebera hamwe imikorere y’ubuyobozi bw’inzego z’ibanze no gushaka uburyo hakemurwa ibibazo bitandukanye biba bibagara mu kazi ka buri munsi, ibi bikajyana no kunoza gutanga serivise nziza.

Iyi nama mpuzabikorwa yayobowe na Nyakubahwa Minisitiri w’ubutegetsi bw’igihugu Musoni James ari kumwe na Guverineri w’Intara y’Iburasirazuba Uwamariya Odette aho iyi nama yari ifite insanganyamatsiko igira iti : « Gutanga serivisi nziza bibe umuhigo mu nzego zose ».

Ministiri Musoni James yatangiye ashimira Akarere ka Kirehe urwego bagezeho mu iterambere, akomeza ashimira abayobozi ubwitange bakorana n’umutima wo gukunda igihugu aho yagize ati : « Iterambere Igihugu cyacu kigezeho rikomoka ku muco w’ubwitange gukunda igihugu, gukorera ku ntego no guha umuturage uruhare mu bimokorerwa ».

Minisitiri Musoni yibukije ko urwego rw’imidugudu arirwo rwego rw’ibanze ku iteramabere ry’abaturage batuye mu mudugugu akaba yavuze ko uru rwego ruhambwa agaciro. Yanibukije ko umuyobozi mu kazi ke ka buri munsi agomba kuba intangarugero, akaba avuga ko mu gihe adakoze neza biri mu bidindiza iterambere ry’igihugu.

Muri iyi nama mpuzabikorwa baganiriye ahanini kuri gahunda zo kunoza imitangire ya serivisi mu nzego zose z’ubuyobozi n’abikorera, imikorere n’imikoranire hagati y’abayobozi, uruhare rw’umuyobozi n’umuturage mu kubungabunga umutekano n’imyiteguro y’igihembwe cy’ihinga.

Abayobozi bitabiriye inama bamaze kugezwaho ibiganiro bitandukanye no kubyunguranaho inama ibitekerezo biyemeje kuba intangarugero mu kunoza imitangire ya serivisi ku baturage bahagarariye kandi bagashishikariza abaturage nabo kunoza serivisi mu bikorwa byabo bibateza imbere cyane cyane abakora umurimo w’ubucuruzi n’abandi bafite abo baha serivisi.

Guverineri w’Intara y’iburasirazuba, Madamu Odette Uwamariya, yibukije abitabiriye inama kunoza imikikorere n’imikoranire hagati y’abayobozi bagamije kuzuzanya mu byo bakora byose, bagafata n’umwanya wo gutega amatwi umuturage no kumugisha inama mu bimukorerwa bikwiye kuba umuhigo wa buri muyobozi.

Guverineri yibukije abayobozi bitabiriye iyi nama ko ari inshingano zabo mu gutanga serivise nziza, akaba abasaba ko mu rwego rwo kunoza akazi ka buri munsi bagomba gutanga serivise nziza zinogeye ababagana.

Muri iyi nama mpuzabikorwa abayobozi biyemeje ko bagiye kugira uruhare rugaragara mu gukumira ibyaha bitandukanye bikigaragara mu karere ka Kirehe kandi ko bagomba gufatanya n’abaturage mu kubungabunga umutekano wabo kuko ariwo shingiro y’iterambere rirambye.

Iyi nama mpuzabikorwa yakurikiranye no gutaha ibikorwa bitandukanye birimo Gare ya Kirehe yuzuye itwaye miliyoni 650 ikaba ifite ubushobozi bwo kwakira imodoka zigera kuri 80.

Iyi gare ifitemo na guest house ndetse n’amazu yo gucururizamo agera kuri mirongo itatu hamwe n’imiryango itandatu ya biro.

Aba bayobozi banatashye urugomero rw’amazi rufasha abaturage kuhira imyaka yabo rwubatswe ku bufatanye n’umushinga wita ku buhinzi n’ubworozi mu karere ka Kirehe KWAMP aho rwuzuye rutwaye amafaranga asaga miliyari imwe.

Grégoire Kagenzi