Ubwo yakirwaga na Polisi y’u Rwanda i Kigali, tariki 11/05/2012, James Oppong Boanu, umuyobozi w’ishami rya polisi rishinzwe kubungabunga amahoro n’umutekano i Darfur muri Sudani, yavuze ko yatewe ibyishimo no kubona abapolisi b’u Rwanda bafite umwihariko mu myifatire myiza no gufasha imbabare.

Oppong ati : «Ntibyoroshye ko umupolisi ashobora guhumuriza uwahungabanye bitewe n’intamabara cyangwa ihohoterwa, ariko abapolisi b’u Rwanda bo bakundwa cyane n’abaturage; babonwa nk’abazanye agakiza».

Uyu muyobozi wa police ya ONU i Darfur yishimira ko Polisi y’u Rwanda iri i Darfur ifite umubare munini w’abagore bagera ku 100, akaba ari yo mpamvu abaturage bose bayibonamo kubera gukemura ibibazo bituruka ku ihohoterwa.

Umuyobozi w’ishami rya polisi rishinzwe kubungabunga amahoro n’umutekano i Darfur yasabye Polisi y’u Rwanda kumwongerera umubare w’abashinzwe kubungabunga amahoro muri Darfur.

Umuvugizi wa Polisi y’u Rwanda, Supt.Theos Badege, yatangaje ko abapolisi b’u Rwanda bagera kuri 230 bari i Darfur bazagumayo, ndetse hari na gahunda yo kubongera.

I Darfur, u Rwanda rwaje ku mwanya wa mbere mu kugira igipolisi cyitwara neza ndetse no kugira abapolisi b’igitsina gore benshi, rukaba rugiye guhabwa igikombe cy’ishimwe n’Umuryango w’Abibumbye; nk’uko Supt. Bagede yakomeje avuga.

Kuri ubu u Rwanda rufite umubare w’abapolisi barenga 500 mu butumwa bw’amahoro hirya no hino mu bihugu nka za Sudani zombi, Haiti na Cote d’Ivoire; ndetse harategurwa n’abandi bazajya mu gihugu cya Sierra Leone.

Simon Kamuzinzi