Ubushakashatsi bw’Ikigo cy’Igihugu cy’Ibarurushamibare (NISR), bugaragaza ko mu gihembwe cya kabiri cya 2025, abantu 5 mu 10 bafite imyaka yo gukora, ni ukuvuga imyaka 16 kuzamura bafite akazi.

Ubushakashatsi bwa NISR, bugaragaza ko igipimo cy’abaturage bafite akazi (Employment-to-Population Ratio - EPR) cyazamutse kigera kuri 53.8% muri Gicurasi 2025, kivuye kuri 52.0% muri Gicurasi 2024.

Abagabo bafite akazi bari kuri 61.7% mu gihe abagore ari 46.8%, naho abafite imyaka 31 kuzamura bikubiye imirimo ugereranyije n’abafite hagati y’imyaka 16 na 30 bangana na 49.1%.

Ikinyuranyo cy’uburinganire hagati y’abagore n’abagabo mu mirimo, NISR igaragaza ko muri Gicurasi 2025, cyari ku gipimo cya 14.9% kikaba cyaragabanutseho gato 0,9% ugereranyije na Gicurasi 2024.

Muri Gicurasi 2025, umubare w’abagore badafite akazi, wari kuri 15.3% ugereranyije n’uw’abagabo aho bari kuri 11.8%. Urubyiruko nirwo rugize umubare munini w’abashomeri, aho bangana na 15.4% ugereranije n’abakuru bari kuri 12.1%. Mu gihe igipimo cy’ubushomeri mu cyaro ari 13.3%, mu Mujyi kikaba 13.7%.