Mu kiganiro kivuga ku kuzahura ubukungu bwa Afrika mu myaka 10 iri imbere, cyabaye tariki 05/08/2014, Perezida Kagame yongeye kugaruka ku nkunga ibihugu bikize bigenera ibikiri mu nzira y’amajyambere kuko izi nkunga zidasubiza mu by’ukuri ikibazo cy’ubukungu bukiri hasi muri Afrika.

Yagize ati « murakoze reka ngire icyo nongera ku byo mugenzi wanjye Macky Sall avuze ariko ku bundi buryo. Afrika ikeneye gukomeza kubaka ubushobozi bwacu mu rwego rwo kugabanya gutega amaboko ku nkunga bisa nk’aho byabaye akarande iwacu.

Twagabanya gutega amaboko turamutse twemeye ibibazo byacu tukabishakira ibisubiza, dukorera hamwe, tugafatanya n’abandi nk’abafite icyo bashoboye kurusha kubategaho amaramuko».

Perezida Macky Sall wa Senegal wari witabiriye ibi biganiro we yagarutse ku bijyanye n’abasebya ibihugu bya Afrika ko bitagira demokarasi kandi bigaragara ko hari intambwe imaze guterwa ishimishije n’ubwo hari bimwe mu bihugu bigifite guhuzagurika mu miyoborere myiza.

Yagize ati « mpereye ku gihe ibihugu byacu byoboneye ubwigenge, muragirango dukore iki ? Twashyizeho uburyo bw’imiyoborere, ariko ntidushobora nonaha kugira demokarasi nk’ibihugu by’Uburayi na Amerika aka kanya, ibyo rwose ni ugukabya ntibishoboka kuko ibihugu byacu birakiyubaka ahubwo ndahamagarira abashoramari b’Abanyamerika kuza gushora imali mu bihugu byacu kuko dufite byinshi byiza».

Naho ku bijyanye n’ikibazo cy’icyorezo cya Ebola gifatwa nk’aho ari umwihariko wa Afrika, ibi ngo ni nko gushaka gutererana uyu mugabane mu guhangana n’ibyorezo mpuzamahanga.

Ati «Ebola ni ikibazo rusange kandi kiri gutwara abantu ariko si umwihariko wa Afrika. Ebola ihangayikishije isi yose n’ubwo ihereye muri Afrika ahubwo twagombye gufatanyiriza hamwe n’abahanga b’isi yose mu kureba uko twarwanya iki cyago nk’uko duhangana n’ibindi byorezo nk’igituntu, za Sida n’izindi ndwara».

Abakuru b’ibihugu by’u Rwanda, Afrika y’Epfo, Tanzaniya, Senegal na Kenya nibo bari bayoboye ibiganiro by’iterambere ry’umugabane kugeza mu myaka icumi iri imbere.Amasosiyete akomeye muri Amerika yiyemeje kuzashora imari muri Afurika ingana n’amadorali miliyari 14 mu mishinga yo kubaka, ingufu, amabanki no mu ikoranabuhanga.

Inama US-Africa summit yatangijwe na Perezida Barack Obama yize ku bibazo bikomereye Afurika birimo uruhare rw’amashyirahamwe atagengwa na Leta, guha agaciro abagore, ubuzima, kwihaza mu biribwa no kurengera ibidukikije.

Inama ihuza abayobozi b’ibihugu bya Afrika na Leta Zunze Ubumwe za Amerika (US-Africa summit) ibaye ku nshuro ya mbere ije ikurikira izindi nama abayobozi b’ibihugu bya Afrika bagirana n’ibihugu bitandukanye bigirana n’abayobozi ba Afrika : Ubuyapani (Tokyo International Conference on African Development), Ubufaransa (Sommet France-Afrique), Ubushinwa (China-Africa Cooperation), Ubumwe b’Uburayi (EU-Africa Summit).

Ephrem Murindabigwi