Cpl Bosongo Boyoma yafashwe taliki 23/05/2014 ku masaha y’umugoroba yasinze yayobewe inzira ajyamo ariko aganira n’itangazamakuru yavuze ko yayombye amayira ubwo yarimo ashyira umugore we imyenda usanzwe utuye mu gace kitwa Birere mu mujyi wa Goma.

Avugana n’itangazamakuru, Cpl Bosongo yatangaje ko yakiriwe neza mu Rwanda agashima ingabo z’u Rwanda zizi kubahiriza uburenganzira bwa muntu kuko yafashwe neza birenze uko asanzwe afatwa mu gihugu cyabo kuko yaryaga gatatu ku munsi kandi iwabo bidasanzwe.

Col Jacques Assambo umwe mu bagize itsinda rya EJVM wo mu gihugu cya Kongo Brazzaville yavuze ko imikoranire y’ingabo z’u Rwanda n’ishami rya ICGLR ihagaze neza, agashimira uburyo ingabo z’u Rwanda zitanga amakuru ndetse zigakorana neza n’iri tsinda.

Ku birebana n’ikibazo cy’ingabo za Kongo zifatirwa mu Rwanda, Assambo avuga ko bikwiye ko ingabo za Kongo zigomba gutozwa kugira imyitwarire myiza no kumenya imipaka y’igihugu cyabo kugira ngo barekere aho gukomeza kwinjira mu gihugu cy’abandi bitwaje ko batazi imbibi kuko umusirikare mu byo yigishwa harimo kurinda ubusugire bw’igihugu agomba kuba azi aho kigarukiye.

Bosongo wafatiwe mu Rwanda avuka ahitwa Kisangani akaba ari mu ngabo zaje gukorera muri Kivu y’Amajyaruguru nyuma yo gutsindwa kwa M23 akaba yiyongera ku basirikare barenga 14 bamaze gufatirwa mu Rwanda bavuga ko bayobye cyangwa bayobewe aho umupaka w igihugu cyabo igarukira bose bakaba barasubijwe mu Rwanda.

Sylidio Sebuharara