Amafaranga angana n’ibihumbi 600 by’amayero(Euro) yo kuzahemba ikigo cyo gukora ayo mategeko, u Rwanda rwayahaye umuryango wa CEPGL ruyatangiwe n’igihugu cy’u Buholandi; umuryango w’ubumwe bw’u Burayi nawo ukaba wongereyeho andi ibihumbi 600 by’amayero(Euro), uyatangiye Kongo Kinshasa.

Ikiyaga cya Kivu kirimo ibinyabuzima bibana n’imyuka itandukanye harimo na gaz metane; ku buryo ngo kuyicukura bishobora kudurumbanya imibereho n’imibanire y’ibiri muri icyo kiyaga.

U Rwanda rumaze gutangira gucukura gazi metane izatanga Megawati 50 z’amashanyarazi; ku ruhande rwa Kongo naho ngo hateganijwe gutangira ibikorwa by’ubucukuzi bw’iyo gazi, ngo yashoboraga kuzateza ibibazo bitandukanye ikoranye n’undi mwuka wa karubone urimo.

Gazi metane mu kiyaga cya kivu ngo irabarirwa hagati ya kirometero kibe(Km355-60) mu gihe umwuka wa dioxide ya karubone(CO2) ari Km3300.

“Hakenewe amabwiriza abashoramari bacukura gazi mu kiyaga cya Kivu bagenderaho, kugira ngo ibikorwa byabo bidahumanya amazi, bigahungabanya ibinyabuzima biri mu Kiyaga ndetse n’abantu bagituriye cyangwa bagikoresha”, nk’uko Jean Bosco Mugiraneza uyobora REG, yabisobanuriye abanyamakuru nyuma yo gushyira umukono ku masezerano.

Icyo CEPGL izakora ngo ni uguhuza ibikorwa ku mpande zombi z’ibihugu bya Kongo n’u Rwanda, mu rwego rwo kwirinda amatati yavuka, nk’uko Umunyamabanga nshingwabikorwa w’uwo muryango uhuza u Burundi, u Rwanda na Kongo; Herman Tuyaga yabitangaje. Kugeza ubu ibikorwa na buri gihugu hashakwa gazi mu kiyaga cya Kivu ngo ntabwo byari byemewe k’urundi ruhande.

Isinywa ry’amasezerano ryitabiriwe n’abahagarariye ba Ambasaderi b’ibihugu n’imiryango bivugwa muri aya masezerano, hamwe n’abungirije ba Guverineri b’intara za Kivu muri Kongo; igihugu cy’u Burundi kikaba cyayitabiriye nk’indorerezi.

Simon Kamuzinzi