Ambasaderi Thorbjørnis Gaustadsæther wa Norvege hamwe na Ambasaderi Frank De Coninck w’Ububiligi bahuye na Mary Baine baganira ku mutekano mucye ubarizwa mu burasirazuba bwa Congo aho yagaragaje ko u Rwanda rushyigikiye imyanzuro yafashwe na ICGRL.

Mary Baine avuga ko icyo u Rwanda rwifuza ari uko ikibazo cy’umutekano mucye ubarizwa mu burasirazuba bwa Congo wabonerwa igisubizo, kandi u Rwanda rwagaragaje ubushake mu gushaka ibisubizo.

Mary Baine yagaragarije aba bahagarariye ibihugu byabo mu Rwanda ko u Rwanda rufite inshingano yo gufasha ibindi bihugu muri Afurika nk’igihugu kicaye mu kanama k’umutekano w’umuryango w’abibumbye bityo rukaba ruhangayikishijwe n’umutekano mucye ugaragara mu burasirazuba bwa Congo.

Nubwo u Rwanda rwakomeje gushyirwa mu majwi ngo rutera inkunga umutwe wa M23 bigatuma ibihugu by’Uburayi bihagarika inkunga byageneraga u Rwanda, Mary Baine yagaragarije abahagarariye ibi bihugu mu Rwanda ko nta ruhare u Rwanda rufite mu ntambara ibera muri Congo ahubwo ko ruhangayikishijwe n’umutekano mucye waho ubangamira n’u Rwanda.

Akaba yatangaje ko u Rwanda rushyigikiye ibiganiro bibera mu gihugu cya Uganda aho bishobora gutanga igisubizo kirambye ku bibazo bya Congo hatabaye kumena amaraso.

Igihugu cy’Ububiligi kiri mu bihugu byanze gushyigikira u Rwanda mu matora arwemerera umwanya mu kanama k’umutekano ku isi bugendeye kuri Raporo yakozwe n’impugucye z’umuryango w’Abibumbye zagaragaje kubogama nk’uko u Rwanda rwabigaragaje.

Mu gihe ibihugu byinshi bigendeye kuri iyi raporo byahagaritse inkunga abayobozi b’igihugu cy’Amerika baheruka gutangaza ko ntabimenyetso bafite bigaragaza ko u Rwanda rutera inkunga M23.

Sylidio Sebuharara