Perezida Kagame asanga ibihugu byose byaba ibiri hafi y’u Rwanda cyangwa kure yarwo ari amahirwe yo gufashanya mu iterambere ku Rwanda.

Yagize ati “Nta giha icyubahiro abaturage bacu nko gufatanya na mwe mu kubaka umugabane wacu, Abashyitsi bari aha ni inshuti nziza zakomeje kutuzirikana mu mitima kandi bakora ibishoboka byose ngo badufashe gutera imbere.”

Yabitangarije mu muhango wari witabiriwe n’abakuru b’ibihugu 21 n’abakuru ba za guverinoma ndetse n’abahagarariye ibihugu n’imiryango ikorera mu Rwanda.

Yavuze ko by’umwihariko ku mugabane w’Afurika hari byinshi bihuza abaturage kuruta ibibatanya, abasaba gukomeza gutahiriza umugozi umwe.

Yashimye ibihugu by’Afurika byahagaze ku ruhande rw’u Rwanda bikanarufasha mu gihe rwari mu bihe bikomeye, avuga ko biri mu byateye ingufu Abanyarwanda kongera umurego mu byo bakora.

Ati “Mwakoze kwifatanya n’abavandimwe na bashiki bacu baturutse hirya no hino muri Afurika kuko bitwongerera ingufu. Afurika yabanye n’u Rwanda mu gihe twari tubikeneye cyane.”

Yavuze ko imyaka irindwi iri imbere ari ingenzi ku Rwanda, kuko intego ya mbere ari ugukomeza igihango afitanye n’abasore n’inkumi, barimo abenshi batoye bwa mbere mu matora ashize kandi bakabikorana umurava n’ubushake.