Ambasaderi Octávio Filomeno Leiro Octávio, yagize ati "Twaganiriye ku mibanire n’ubufatanye hagati ya Angola n’u Rwanda, ndetse n’uburyo bwo gushimangira umubano mu karere kacu no muri Afurika yose ".

Hon. Dr Kalinda, avuga ko ibiganiro byabo byibanze ku mubano wari usanzweho, barebera hamwe n’ibyo bakongeramo imbaraga.

Ati "Twaganiriye ku bikorwa dusanzwe dufatanyamo birimo itumanaho, inganda, umutekano n’ubukerarugendo. Twanaganiriye no ku buryo Inteko z’ibihugu byombi zakomeza kubaka umubano”.

U Rwanda na Angola ni ibihugu bisanzwe bifitanye umubano mwiza, aho ibihugu byombi bifitanye amasezerano y’ubufatanye mu gukumira ibyaha, gukora iperereza, gukurikirana ndetse no mu gushinja ibyaha mu manza zitandukanye.

Aya masezerano yemerera kohereza abantu bakatiwe igifungo kirenze imyaka ibiri, bisabwe n’ubuyobozi bwa kimwe mu bihugu byombi. Yasinyiwe i Kigali na Minisitiri w’Ubutabera wa Angola, Francisco Queiroz na mugenzi we w’u Rwanda, Dr Emmanuel Ugirashebuja.

Ibihugu byombi bifitanye amasezerano mu rwego rw’ubucukuzi bw’amabuye y’agaciro n’imigenderanire, aho byakuriranyeho Visa ku baturage babyo.