Nyuma y’ibiganiro na Minisitiri w’Intebe, Ambasaderi Fahrenholtz yatangarije abanyamakuru ko kuri uyu wa gatatu tariki 12/11/2014, u Rwanda n’u Budage bizaganira ku byashingirwaho mu mubano w’ibihugu byombi mu gihe cy’imyaka itatu iri imbere; kandi ko mu cyumweru gitaha Minisitiri w’ububanyi n’amahanga w’igihugu cye azazana abashoramari bashaka kuza gukorera mu Rwanda.

“Ejo tuzumvikana ku buryo u Budage bwakomeza kunganira u Rwanda muri gahunda zinyuranye zo kuruteza iterambere, ariko nkaba nanamenyesha ko Minisitiri w’ububanyi n’amahanga w’igihugu cyacu azazana itsinda ry’abantu bakomeye bagera kuri 80, barimo abashoramari ndetse n’abanyamakuru bo kuzajya kugaragaza ibikorwa by’indashyikirwa u Rwanda rumaze kugeraho”, Ambasaderi Fahrenholtz.

Yavuze ko yishimiye uburyo u Rwanda rwakoresheje inkunga imaze kugera kuri miliyoni 60 z’amayero rwahawe n’u Budage mu guteza imbere imyuga inyuranye ikorerwa mu dukiriro, mu bijyanye no kwegereza ubuyobozi n’ubushobozi abaturage, ndetse no mu bikorwa binyuranye bigamije iterambere rirambye.

Amb Fahrenholtz ati “Iterambere ry’imyuga ni ikintu gikomeye cyane, kuko urubyiruko rw’abanyarwanda rukeneye kuva mu bushomeri, rugakora imirimo ikenewe n’abikorera, yaba ibaruramari, amashanyarazi, ubukanishi n’ibindi; ibi akaba aribyo ubukungu bw’igihugu bushingiraho buzamuka”.

Mu biganiro inzego za Leta y’u Rwanda zizagirana n’itsinda riyobowe na Ministiri w’ububanyi n’amahanga w’u Budage ngo harimo ikijyanye no guteza imbere umuco, aho bifuza ko abanyarwanda batangira kwiga ururimi rw’ikidage, nk’uko Ambasaderi w’u Budage yabitangaje.

Minisitiri ushinzwe imirimo y’inama y’abaministiri, Stella Ford Mugabo wari kumwe na Ministiri w’Intebe agirana ibiganiro na Ambasaderi w’u Budage, yatangarije abanyamakuru ko u Rwanda ruhaye ikaze inozwa ry’ubutwererane n’ishoramari ry’u Budage; ngo rizibanda ku iterambere ry’ingendo zo mu kirere n’ibikorerwa ku bibuga by’indege.

Biragaragara ko ibihugu by’u Burayi byahagurukiye gushora imari mu Rwanda, aho kuri uyu wa mbere igihugu cy’u Buholandi nacyo cyatangaje ko Minisitiri wacyo ushinzwe ubutwererane n’ubucuruzi n’amahanga, azazana mu Rwanda itsinda ry’abashoramari; ndetse na Ambasaderi w’u Bubiligi akaba yaratangaje ko igihugu cye nacyo kigiye kugera ikirenge mu cya bigenzi byacyo.

Simon Kamuzinzi