Madame Labelle atangaza ko u Rwanda rudakwiye kwirara kuko ko nta ruswa nini cyangwa nto ibaho kuko zose ari umwanzi, nk’uko yabitangarije abanyamakuru nyuma yo kuganira n’umuvunyi mukuru, Madame Aloysie Cyanzayire, kuri uyu wa Mbere tariki 17/2/2014.

Yagize ati "Ruswa itangirwa mu rwihisho kandi mu bihugu byinshi icyo tubona ni ruswa ya buri munsi kandi iyo nayo ntiyagakwiye kwitwa ruswa nto kuko niba abaturage bakennye, bafite amafaranga macye niba rero bagomba kwishyura inzoga kugira ngo babone serivisi z’ubuzima cyangwa bahabwe ibicuruzwa byabo kuri duwane ntekereza ko n’iyo ruswa nto yangiza abantu."

Aha yasubizaga ikibazo yari abajijwe n’abanyamakuru ku cyo avuga kuri ruswa ntoya ikunze kugaragara mu Rwanda.Yongeyeho ariko ko ashima uburyo mu Rwanda hari itegeko rirengera abatanga amakuru kuri ruswa, agasanga hari icyo bizafasha kinini.

Umuvunyi mukuru, Aloysie Cyanzayire, yatangaje ko basobanuriye uyu mushyitsi uburyo ubufatanye n’inzego zitandukanye, zirimo iza Leta n’izikorera ku giti biri mu bituma u Rwanda ruri ku kigero kiri hasi kuri ruswa kugeza ubu.

Ati "Hari ibintu bifatika bigaragaza ko hari intambwe u Rwanda rwateye unahereye no kuri cya cyegeranyo Transparency isohora buri mwaka u Rwanda ruza mu myanya ya mbere muri Afurika ariko by’umwihariko rukanaza imbere mu bihugu by’aka karere. Ibyo ni kimwe mu bigenda bigaragaza ko u Rwanda rutera intambwe mu kurwanya ruswa."

U Rwanda ruri mu bihugu bicye umuryango Tranparency International wemera ko hari intambwe yatewe mu kurwanya ruswa n’akarengane, cyane cyane ko babishingira ku bushakashatsi buba bwakorewe ku banyagihugu.

Emmanuel N. Hitimana