Byavugiwe mu nama yabahuje na zimwe mu nzego za Leta ndetse n’abafatanyabikorwa batandukanye, kuri uyu wa 20 Ukwakira 2015.

Ngendandumwe Jean Claude, Umunyamabanga w’Ihuriro ry’Imiryango ya Sosiyete Sivile (CCOAIB), avuga ku byo Leta yakagombye kongeramo ubufatanye na Sosiyete Sivile, yagize ati "Sosiyete sivile ni yo igera cyane kuri ba baturage batabasha kwivugira bityo yakagombye guhabwa umwanya munini mu nzego zifata ibyemezo kugira ngo igaragaze ibibazo bahura na byo".

Ngendandumwe akomeza avuga ko Sosiyete Sivile yakagombye kumenyeshwa politiki cyangwa amabwiriza agiye gusohoka, ikabanza ikayasoma, ikayumva bityo ikareba niba ibirimo bijyanye n’ibyifuzo by’abaturage.

Umunyamabanga Uhoraho muri Minisiteri y’Ubutegetsi bw’Igihugu, Munyeshyaka Vincent, avuga ko Sosiyete Sivile itajya yirengagizwa na rimwe muri gahunda z’igihugu.

Agira ati" Sosiyete Sivile ifite umwanya ugaragara muri gahunda za Leta kuko mu igenamigambi mu nzego z’ibanze ari ho berekanira ibyifuzo byabo ndetse n’ibyo bashaka gukora kandi bigahabwa agaciro".

Munyeshyaka akomeza avuga ko mu itegurwa ry’ingengo y’imali y’uwu mwaka wa 2015-2016, Sosiyete sivile ndetse n’abikorera bahawe umwanya uhagije ngo bagaragaze ibitekerezo byabo, gusa ngo aho bifuza ko umwanya wakongerwa byaganirwaho.

Umuyobozi Wungirije mu Kigo cy’igihugu cy’imiyoborere (RGB), Ambasaderi Fatuma Ndangiza, na we wari witabiriye ibi biganiro yavuze ko Sosiyete sivile itajya yimwa umwanya.

Icyakora ngo kubera inshingano nyinshi Leta igira kandi iba igomba gukurikirana, hashobora guca igihe nta biganiro bikorwa hagati y’impande zombi, gusa ngo ntibagire impungenge.

Munyantore Jean Claude