Ibi yabitangarije abanyeshuri bo mu ishuri ryigisha ubuhinzi n’ubworozi ry’i Huye (bamwe bazi ku izina rya EAVK) ndetse n’abandi banyeshuri bari baturutse mu bigo icyenda byo mu Karere ka Huye bari bitabiriye amarushanwa ku kuvugira mu ruhame (public speaking), tariki 23/2/2014.

Dr. Nkurunziza Joseph, umwe mu bashinze Never Again Rwanda mu mwaka wa 2002 ubwo bigaga muri Kaminuza y’u Rwanda, ishami rya Huye yagize ati “abantu bamwe bajya bavuga ngo abakoroni ni bo batumye Jenoside iba. Ariko se, abakoroni ni bo batubwiye ngo twice abavandimwe bacu? Ni bo babwiye ababyeyi ngo bice abana babo? Yego hari uruhare rw’abakoroni ku byabaye mu gihugu cyacu, ariko na none hari n’urwacu Abanyarwanda.”

Uyu mudogiteri yakomeje avuga ko iyo Abanyarwanda bose baza kuba bifitemo gutekereza ku byo babwirwa mbere yo kugira icyo bakora (critical thinking) Jenoside itari gushoboka.

Ni na yo mpamvu uyu muryango Never Again akenshi ukoresha amarushanwa mu rubyiruko ku kuvuga, kuko mu gutegura imbwirwaruhame zabo, bahereye ku nsanganyamatsiko baba bahawe ijyanye n’umuco wo kwimakaza amahoro, bafata n’umwanya wo gutekereza.

Uretse kuvugira imbere y’abantu, Never Again Rwanda inafasha urubyiruko kugira ibiganirompaka bibatoza kwemera ibitekerezo bya bagenzi babo (kuba udahuje ibitekerezo n’umuntu ntibivuga ko mugomba gukimbirana).

Marie Claire Joyeuse