Hon. Muha ari mu Rwanda mu ruzinduko rw’iminsi itanu, rugamije gusangira ubunararibonye bw’ibihugu byombi, ndetse rukagirira akamaro Inteko Ishinga Amategeko y’igihugu cye cya Namibia.

Senateri Kalinda yagize ati "Twaganiriye ku nzira zo kuzamura umubano w’Inteko Ishinga Amategeko hagamijwe inyungu z’abaturage b’u Rwanda n’aba Namibia."

Uyu muyobozi muri Namibia, yabonanye na Visi Perezida ba Sena y’u Rwanda, Hon Esperance Nyirasafari na Dr. Alvera Mukabaramba, kugira ngo bungurane ibitekerezo ku mikorere y’Inteko zishinga Amategeko, ndetse n’uburyo bwo kuzamura Diplomasi y’Inteko Ishinga Amategeko.

Perezida w’inama y’igihugu ya Namibiya, Lukas Sinimbo Muha, muri gahunda ze azasura Urwibutso rwa Jenoside rwa Kigali ruri ku Gisozi, ndetse n’Inzu Ndangamurage y’Urugamba rwo guhagarika Jenoside, anasure inzego z’ubuyobozi zitandukanye.

U Rwanda na Namibia bisanzwe bifitanye umubano mwiza, aho u Rwanda rwishimira ubufatanye bw’ibihugu byombi mu bijyanye n’umutekano, ndetse ibihugu byombi byashyize umukono ku masezerano y’ubufatanye mu bijyanye n’ubucuruzi n’ishoramari, ubucukuzi bw’amabuye y’agaciro, serivisi z’ikirere, ubuhinzi, ubuzima, ubukerarugendo, ibikorwa remezo, ingufu, ICT, Ibidukikije, Umuco n’Uburezi.