Hashize iminsi ibihugu byombi bitavuga rumwe ku ntambara ibera mu burasirazuba bwa Congo bwegeranye n’u Rwanda, aho zimwe muri za raporo zakomeje gushinja u Rwanda gushyigikira umutwe wa M23 urwanya Leta y’iki gihugu.

Nubwo u Rwanda rwakomeje kubihakana ruvuga ko nta nyungu rufite mu kwivanga muri iyo ntambara, uruhande rwa Leta ya Congo kimwe n’amwe mu mahanga yo yakomeje gutsimbarara ko u Rwanda rubyihishe inyuma cyane cyane ko abarwana ari Abakongomani bavuga Ikinyarwanda, basaba ko bahabwa uburenganzira nk’ubwa’Abandi Banyekongo.

Leta y’u Rwanda yakomeje guhamagarira impande zombi kwicara hamwe bagashakisha umuzi w’ikibazo aho gushyira intambara imbere.

Nubwo rimwe na rimwe bitarworoheye kubasha kumvisha uruhande rwa Congo akamaro ko gushaka umuti w’ikibazo, hari ingero zerekana ko zishaka ko umuti w’ikibazo waboneka, nk’uko byagenze ubwo Umukuru wa Sena y’iki gihugu yagendereraga u Rwanda mu ruzinduko rudasanzwe rumenyerewe hagati y’ibihugu byombi, kuri uyu wa Mbere tariki 06/05/2013.

Senateri Kengo wa Dondo, uyoboye Sena ya Congo-Kinshasa yaje mu rwego rwo kuganira na mugenzi we w’u Rwanda, Senateri Jean Damascene Ntawukuriryayo, kureba igitera iyo mitwe yitwaje intwaro no kureba uruhare rwa Sena zombi mu gukemura icyo kibazo.

Ibi nibyo Senateri Ntawukuriryayo yahereyeho yemeza ko kuba Abanyekongo baje gusura u Rwanda bakanagirana ibiganiro bigaragaza ubushake bw’ibihugu byombi. Yatangaje ko nka Sena y’u Rwanda yizera ko ibiganiro bibaye buri kibazo cyose cyabonerwa umuti.

Abasenateri bagize amakomisiyo ashinzwe ububanyi n’amahanga mu bihugu byombi mu nama bagiranye.

Umuyobozi wa Sena y’u Rwanda akomeza avuga ko ikibazo kiri mu Burasirazuba bwa Congo kiremereye kuko hariyo Interahamwe, hariyo abakoze Jenoside mu Rwanda, hakaba Abanyekongo b’Abanyarwanda bahora birukanwa ariko abantu ntibagire ikintu bakivugaho.

Yagize ati: “Iyo uganira ntabwo urambirwa n’ubwo hari igihe waganira n’umuntu ntiyumve ariko ibiganiro bigomba gukomeza iyo ari cyo wiyemeje. Nta kurambirwa kurimo iyo ushaka gucyemura ibibazo, ibiganiro bizakomeza kugeza igihe bizabonerwa umuti”.

Ibi nabyo nibyo byemezwa na Senateri Dondo, wemeza ko kuganira ari byo by’ingenzi ndetse bikaba ari nabyo byamuzanye mu Rwanda. Akemeza ko nta terambere rirambye ryaba mu karere mu gihe hakiri ayo makimbirane.

Gusa yirinze kugira icyo atangaza ku kibazo yari abajijwe n’umunyamakuru niba Leta y’igihugu cye izakomeza ibiganiro n’umutwe wa M23, nyuma y’aho yari yabihagaritse. Yavuze ko umwanya we utamwemera kugira icyo akivugaho ariko yongeraho ko Leta ye izakora icyo ibona kibereye kuzana amahoro.

Senateri Dondo ari mu Rwanda aherekejwe n’itsinda ry’abadepite rigize komisiyo ishinzwe ububanyi n’amahanga muri Congo. Bakiriwe n’abagize komisiyo nk’iyo yo mu Rwanda, banagize ibiganiro by’umunsi wose byiga ku bibazo bya Congo, mbere y’uko basubira iwabo.

Emmanuel N. Hitimana