Iki gikorwa cyagombaga kumara amezi 15, ubu kimaze amezi 12 kigeze kuri 3% mu gihe amasezerano yo kubaka imihanda yasinywe mu kwezi kwa Werurwe 2013 agomba kurangira muri Nyakanga 2014.

Umunyamabanga wa CEPGL, Herman Tuyaga yatangaje ko hamaze gukorwa inama 4 zo kwiga ku mikorere ya SAFKOKO ariko ngo haragaragara icyererwa ry’amezi 9 ataragize ikiyakorwamo.

Uku kudindira kw’ibikorwa byo gukora iyi mihanda iterwa inkunga n’umuryango w’ubumwe bw’Iburayi byatumye uyu muryango wandikira CEPGL uyisaba ko yahagarika amafaranga ahabwa SAFKOKO kubera kutubahiriza amasezerano.

Igikorwa cyo kubaka imihanda ihuza imijyi ihuza ibihugu bigize CEPGL cyagombaga kurangira gitwaye miliyoni zigera kuri 25 z’amayero harimo 9 328 053,12 z’amayero ku ruhande rwa Congo, 8 298 012,17 z’amayero ku ruhande rw’u Burundi hamwe na 6 301 619,24 z’amayero ku ruhande rw’u Rwanda.

Ibi bikorwa bitangira byari bihuje amasosiyete abiri arimo SAFRICAS na SEBURIKOKO ariko baza kugirana ibibazo bituma batandukana, biba imwe mu mbogamizi yatumye ibikorwa bidindira kuko SAFRICAS yagiye gukorera i Goma, Seburikoko agakomeza mu gihe hari hamaze gutangwa amafaranga agera kuri miliyoni 4 z’amayero atuma ibikorwa bitangira.

Nyuma y’inama yahuje abahagarariye SAFKOKO, CEPGL n’umuryango w’ubumwe bw’uburayi kuri uyu wa 13/3/2014, umunyamabanga wa yatangaje ko SAFKOKO imaze gusaba ko yakongererwa igihe kugira ngo irangize ibyo isaba ariko ubuyobozi bw’umuryango wa CEPGL buvuga ko bugomba kubikorana ubushishozi kugira ngo harebwe ko n’amahirwe yahabwa yashobora kuyakoresha neza.

Herman Tuyaga avuga ko ibikorwa byo kubaka imihanda ihuza imijyi y’ibihugu biri mu bikorwa bifasha abaturage guhahirana no kwihutisha iterambere, ndetse bikaba bifatwa nk’ibikorwa byafasha akarere kugarura amahoro ku buryo CEPGL itarebera uko byangizwa.

Sylidio Sebuharara