Uyu muvugizi wa polisi, Senior inspector of police Jean Marie Njangwe yavuze ibi nyuma y’uko abaturage bo mu murenge wa Gishari bashyikirije polisi abagabo babiri bakekwaho kuba biriwe bacuruza inyama z’imbwa bavanze n’iz’ihene mu mirenge itatu yo mu karere ka Rwamagana.

Batawe muri yombi bakekwaho gucuruza inyama z’imbwa. Ngo nibibahama bazahanirwa icyaha cyo kuroga, bafungwe burundu.

Mu gitondo cy’ejo kuwa 08/10/2013 aba bagabo ngo baturutse mu murenge wa Fumbwe ahitwa Nyagasambu bagenda bahamagarira abantu kugura inyama z’ihene bagendaganaga mu mufuka, bagurisha umugenda mu mayira.

Ngo bagendaga bibanda cyane cyane ahari ibyocyezo botsaho inyama benshi mu Rwanda bita burusheti (brochettes), bava aho Nyagasambu muri Fumbwe baza gufatirwa gufatirwa mu murenge wa Gishari, bamaze kwambuka imirenge ya Fumbwe, Musha na Munyiginya.

Nyinawaganwa Emma Gloria, ni umunyamabanga nshingwabikorwa w’akagari ka Cyinyana mu murenge wa Gishari, aho abo bagabo bafatiwe. Yabwiye Kigali Today ko abo bagabo binjiye mu kabari kamwe, bakajya kubagurishaho inyama bitaga iz’ihene ariko ngo uwotsa inyama aho hantu akavuga ko amatungo abiri bari bafite atari ihene yombi. Ngo yari amatungo bakuyeho uruhu ariko bigaragara ko atari ay’ubwoko bumwe.

Nyinawagaga yagize ati “Mucoma wotsa inyama muri ako kabari yitegereje inyama z’amatungo abiri bagurishaga, avuga ko rimwe ryari ihene ariko irindi ngo abona ntabwo ari ihene. Bahamagaye abandi baturage bari hafi aho ngo bitegereje neza babona ibimenyetso bise ko ari iby’inyamaswa y’imbwa.”

Abaturage benshi bari bahururiye kureba inyama bitaga iz’imbwa

Aba bagabo bahise batabwa muri yombi, bashyikirizwa polisi y’igihugu mu karere ka Rwamagana, ubu bakaba bacumbikiwe kuri station ya Kigabiro muri Rwamagana.

Umuvugizi wa polisi mu ntara y’Iburasirazuba, Senior Inspector Jean Marie Njangwe yabwiye Kigali Today ko abo bagabo bafungiwe icyaha mu Rwanda bita kugabura ibintu bitaribwa, bakaba ngo bashobora kuzahanishwa ingingo ya 144 yo mu mategeko ahana, ivuga ko umuntu uhamwe n’icyaha cyo kuroga afungwa burundu.

Bamwe mu baturage b’aho i Rwamagana bamenye aya makuru wasangaga baguye mu kantu, bavuga ko wasanga bamaze iminsi barya inyama z’imbwa batabizi kuko ngo batakwizera ko abotsa inyama za burusheti bahora bari maso ngo botse inyama z’amatungo bagenzuye neza.

Uwitwa Maman Bishop ufite akabari ariko yabwiye Kigali Today ko batabasha kugenzura neza inyama botsa buri gihe kuko utubari tutagira abakiliya benshi ngo tutagura itungo rizima (ihene cyangwa inka) bagura inyama nke ku bazicuruza, bityo ngo ugasanga bashobora kugura ibiro nka bitanu by’inyama bazi ko ari ihene kandi bishoboka ko zaba ari iz’irindi tungo.

Abandi baturage ariko bavugaga ko niba nta muntu wariye izo nyama ngo agire icyo aba abo bantu badakwiye gufungirwa icyaha cyo kuroga.
Umuco Nyarwanda ufata imbwa nk’itungo ritaribwa, ariko mu Rwanda higeze kuvugwa ko hari abanyamahanga bajya barya imbwa kuko mu mico y’iwabo imbwa ari itungo riribwa nk’ayandi mu buryo bwemewe n’amategeko. Birashoboka ndetse ko haba hari n’Abanyarwanda bariye kuri ayo matungo aho bagenda mu mahanga.

Ahishakiye Jean d’Amour