Ibi IGP Gasana yabivugiye mu Karere ka Rwamagana, ku wa Kabiri, tariki ya 28 Mata 2015, ubwo yasozaga amahugurwa y’iminsi ibiri yari agenewe abagenzacyaha n’abashinjacyaha ku rwego rw’ibanze mu Ntara y’Uburasirazuba; yari agamije kubongerera ubumenyi mu kazi ndetse no kunoza imikoranire.

IGP Gasana yabwiye abagenzacyaha ko imikorere yabo ikwiriye kugendana n’umuvuduko w’iterambere u Rwanda ruriho kandi ntisigane n’ikoranabuhanga ririmo irya interineti, ngo kuko muri iyi minsi ibyaha bishingiye ku ikoranabuhanga byiganje cyane.

Ibyo ngo birasaba abapolisi guhora bihugura kandi bakivugurura mu mikorere yabo kugira ngo bakore igipolisi cy’umwuga kijyanye n’igihe.

Umuyobozi Mukuru w’Ishami ry’Ubugenzacyaha muri Polisi y’u Rwanda, ACP Theos Badege, yavuze ko aya mahugurwa ku bagenzacyaha n’abashinjacyaha azatuma habaho kunoza imikoranire hagati y’izi nzego kandi akazatanga umusaruro mu mitunganyirize y’amadosiye akorwa n’abagenzacyaha.

Mu rwego rwo guhangana n’ibyaha birimo ibikorwa hifashishijwe ikoranabuhanga, Polisi y’Igihugu itangaza ko kugeza ubu ikorana na Polisi z’ibihugu bikikije u Rwanda ndetse na Polisi Mpuzamahanga (Interpol) kugira ngo nihagira icyaha gikorwa, batahure uwagikoze.

Aya mahugurwa y’iminsi ibiri yarimo abagenzacyaha ku rwego rw’ibanze 25, abayobozi ba Sitasiyo za Polisi 17 ndetse n’abashinjacyaha ku rwego rw’ibanze 5; bose bakorera mu Ntara y’Iburasirazuba.

Emmanuel Ntivuguruzwa