Nyuma y’umuganda rusange wabaye tariki 25 Mutarama 2014, mu mudugudu wa Nyagacaca, akagari ka Ruyenzi, mu murenge wa Runda, Nyirandayisabye Christine uyobora umurenge wa Runda, yibukije abaturage ko gukora umuganda bigenwa n’itegeko.

Yabashishikarije kuwitabira kuko ariho abantu bahura bakagezwaho zimwe muri gahunda za Leta. Mu muganda kandi ngo abaturanyi barahahurira bakabwirana amakuru, dore ko indi minsi buri wese aba yazindukiye mu kazi ke ntibagire umwanya wo kubonana.

Muri gahunda bagejejweho uwo munsi, abitabiriye umuganda bibukijwe ko kuva tariki 20/1/2014, mu gihugu hose hatangijwe ukwezi kw’imiyoborere myiza kuzarangira Tariki 15/3/2014.

Muri uku kwezi hakazibandwa ku gukemura ibibazo by’abaturage, kurangiza imanza, gutangiza Itorero mu mashuri no kwita ku mutekano. Abayobozi bibukije abaturage ko buri wa mbere ku biro by’akagari bakira ibibazo, naho ku wa kane ibibazo bikakirirwa ku murenge.

Abitabiriye umuganda kandi bibukijwe ko kuwa gatandatu tariki 1/2/2014, ari umunsi w’Intwari, kuri uwo munsi hakazatangizwa gahunda ya “Ndi umunyarwanda” ku rwego rw’umudugudu, abaturage bakaba basabwe gutangira gutegura ibirori byo kwizihiza uwo munsi.

Bamwe mu bitabiriye umuganda, bahamya ko kwitabira umuganda bituma bamenya amakuru kuri gahunda ziteganyijwe kuko abenshi batirirwa mu kagari.

Umwe muri bo aragira ati “erega umuntu aba yagiye mu kazi ku buryo iby’iminsi mikuru na gahunda zigezweho muri politiki adapfa kubimenya. Nk’ubu umuntu utaje mu muganda ntazi aho umunsi w’Intwari uzizihirizwa”.

Mu rwego rwo gushishikariza abaturage kwitabira umuganda, ubuyobozi bwagennye ifishi, uwaje mu muganda asinyirwaho n’umukuru w’umudugudu atuyemo. Iyo fishi ngo ntigamije guhana abataje mu muganda, ahubwo ni imwe mu nzira zo guhwitura abatitabira umuganda.

Marie Josee Uwiringira