Uru rubyiruko rwatunganyije ahari kubakwa ibyumba by’amashuri y’uburezi bw’ibanze bw’imyaka 12 mu murenge wa Gihango mu karere ka Rutsiro. Icyo gikorwa cyitabiriwe n’urubyiruko 280 rwaturutse mu ma santrali atandatu agize paruwasi ya Crète Congo Nil.

Bamaze iminsi itatu mu ihuriro ry’urubyiruko, basenga, basabana, bahugurwa ku bumenyi butandukanye mu byerekeranye n’ijambo ry’Imana, ariko batibagiwe n’ibikorwa by’iterambere harimo n’uwo muganda.

Umwe mu bitabiriye iryo huriro witwa Nyiranduhura Annonciata yagize ati : “Gusenga bijyana n’ibikorwa, tugasenga dufite n’umutima wo gutanga ubufasha mu bikorwa bitandukanye by’iterambere”.

Ibi kandi byagarutsweho n’undi witwa Imaniragaba Ildephonse, aho we asanga igikorwa cy’umuganda bakoze ari uburyo bwo gutegura aho barumuna babo ndetse n’abana babo bazigira.

Ati: “Roho nziza igomba gutura mu mubiri muzima, amaboko yacu ni yo agomba gukorera igihugu cyatubyaye”.

Umunyamabanga nshingwabikorwa w’umurenge wa Gihango, Niyodusenga Jules, yavuze ko uwo muganda ari umusanzu ukomeye basigiwe n’urwo rubyiruko.

Ati: “ Ibintu bijyanye n’amasuku cyangwa finissage byari bikiri imbogamizi none badufashije kuzikuraho ndetse badufasha kwesa uwo muhigo ku buryo uyu munsi wa none tuvuga ko abanyeshuri bazatangira hafite isuku, hameze neza nta kibazo gihari”.

Malachie Hakizimana