Umugore we witwa Anastasie Nyirabasinga yavuze ko Hakizimana yavuye iwe mu rugo hagati ya saa kumi n’imwe na saa kumi n’ebyiri za mu gitondo yerekeza ku kigo cya Lycée de Nyundo agiye kureba icyangombwa cyemeza ko umwana wabo witegura gukora ikizamini cya Leta gisoza amashuri yisumbuye yahize icyiciro rusange (Tronc Commun).

Yagezeyo arakibona ahita agaruka ariko akiri hafi y’ikigo hakaba no hafi y’ibiro by’umurenge wa Nyundo ahita agongwa n’imodoka yitaba Imana.

Ababibonye bavuga ko yari kuri moto, noneho imodoka nini y’uruganda rwenga inzoga (BRALIRWA) imuturuka inyuma, imuca ku ruhande ariko igice cyayo cy’inyuma kiramugonga kimukururira munsi y’amapine, imodoka iramukandagira ku buryo bukomeye.

Patrice Hakizimana, Ubwo yavugaga umuvugo mu birori byo kwizihiza umunsi mpuzamahanga w’umugore tariki 08/03/2013 ku rwego rw’akarere ka Rutsiro.

Umurambo we wamaze kugezwa iwe mu rugo, aho yari asanzwe atuye mu kagari ka Nyakarera mu murenge wa Ruhango mu karere ka Rutsiro bikaba biteganyijwe ko ashyingurwa kuri uyu wa gatatu tariki 24/04/2013.

Hakizimana yari umugabo wubatse w’imyaka 48 y’amavuko akaba asize umugore n’abana batatu b’abakobwa. Yari amaze umwaka umwe ari umukozi ushinzwe imibereho myiza y’abaturage mu murenge wa Boneza.

Mbere yaho yabanje gukorera mu murenge wa Mushubati mu gihe kigera ku myaka itanu, aho yabaye umukozi ushinzwe irangamimerere, aza no kuba umukozi ushinzwe imibereho myiza y’abaturage muri uwo murenge wa Mushubati.

Yabaye n’umwarimu mu bigo by’amashuri bitandukanye birimo ishuri ryisumbuye rya APAKAPE no mu ishuri ryisumbuye rya Murunda.

Malachie Hakizimana