Ku ikubitiro izo nyakiramashusho zizashyirwa mu bigo by’amashuri, ibigo nderabuzima ndetse n’ahandi ku dusanteri hakunze guteranira abantu benshi; nk’uko bisobanurwa n’umuyobozi w’akarere ka Rutsiro, Byukusenge Gaspard.

Bamwe mu baturage b’akarere ka Rutsiro bishimiye iyo gahunda ibateganyirijwe ariko bagaragaza impungenge z’uko hari aho televisiyo Rwanda itabasha kugaragara neza.

Kuri icyo kibazo, umuyobozi w’akarere ka Rutsiro avuga ko bisaba kuvugana n’ababishinzwe kugira ngo bakomeze barebe uko cyakemuka.

Abandi baturage na bo bavuga ko hari aho batarabona umuriro bityo bagashaka kumenya uko bazabasha kubyaza umusaruro izo nyakiramashusho. Umuyobozi w’akarere asanga bishoboka ko aho batarabona umuriro bagurirwa inyakiramashusho idahenze cyane hanyuma hakagurwa na moteri yo kuyikoresha.

Kuba nyinshi muri izo nyakiramashusho zizaba ziri mu bigo, ngo nta mpungenge bigomba gutera abaturage bo mu mudugudu icyo kigo giherereyemo kuko na bo bazemererwa kwinjiramo bakabasha gukurikirana amakuru cyangwa se n’ibindi biganiro.

Icy’ingenzi ngo ni uko bizajya bikorwa kuri gahunda ndetse no ku masaha atabangamiye gahunda z’ikigo.

Malachie Hakizimana