Ayo marushanwa ku rwego rw’intara yabereye mu karere ka Karongi gaturanye cyane n’akarere ka Rutsiro. Yitabiriwe n’abagiye batsinda amarushanwa yo ku rwego rw’uturere haba mu mivugo ndetse no mu ndirimbo.

Indirimbo y’itsinda ry’abo banyeshuri ryitwa Abishyize Hamwe yari yatsinze amarushanwa yo ku rwego rw’akarere, bakaba bari bamaze ukwezi n’igice barushaho kuyiryoshya neza kugira ngo bazayiserukane mu marushanwa yo ku rwego rw’intara.

Icyakora ntabwo babashije kwitabira ayo marushanwa kubera ko ku munsi nyir’izina w’amarushanwa bazindukiye ku cyicaro cy’akarere ka Rutsiro, dore ko ari ko kari gafite inshingano zo kubatwara no kubatunga kuri uwo munsi w’amarushanwa, ariko basanga akarere nta buryo kigeze gategura bwo kubafasha kwitabira ayo marushanwa.

Abo banyeshuri bananiwe kwiyumvisha ko basezerewe batagerageje amahirwe yabo, bakomeza gutegereza ko akarere kabaha uburyo bwo kugera ahabereye amarushanwa ariko baraheba. Ku isaha ya saa kumi z’umugoroba babajije aho amarushanwa ageze babwirwa ko agiye kurangira, bituma batakaza icyizere cyose bari bafite cyo kuyitabira no kuyatsinda, bafata inzira basubira mu kigo.

Umwe muri abo banyeshuri yagize ati “twababaye kabisa kuko ubusanzwe twageraga n’i Kigali ku rwego rw’igihugu tugatsinda amarushanwa.” Kuri iyi nshuro na ho ngo bari bifitiye icyizere kuko bumvise ibyo abitabiriye ayo marushanwa berekanye basanga iyo bagerayo bari kubarusha.

Iryo tsinda risanzwe rigizwe n’abanyeshuri 22 ariko bari bitabiriye ari icumi gusa nk’uko byari mu mabwiriza bari bahawe n’abateguye ayo marushanwa ku rwego rw’intara, usibye ko na bo batabonye uburyo buborohereza kugera ahabereye amarushanwa.

Kuba batabashije kwitabira ayo marushanwa ngo ni igihombo kuri bo, ku kigo cyabo ndetse no ku karere muri rusange bari basohotse bahagarariye.

Bimenyimana Fidele ushinzwe imiyoborere myiza mu karere ka Rutsiro yavuze ko umunsi w’amarushanwa ku rwego rw’intara akarere kawumenye bitinze ku buryo batabashije gutegura uburyo bwo korohereza iryo tsinda ry’abanyeshuri icumi ryagombaga kwitabira ayo marushanwa ku rwego rw’intara.

Yabasabye kwihangana no kudacika intege ahubwo bagakomeza imyiteguro kuko bashobora kuzagira amahirwe yo kwitabira andi marushanwa ateganyijwe mu bihe biri imbere.

Iryo tsinda ry’abanyeshuri ritabashije kugera ahaberaga amarushanwa ku rwego rw’intara ngo na ryo rigerageze amahirwe yaryo, umwaka ushize wa 2013 ryari ryasohotse rihagarariye intara y’Uburengerazuba, ribasha kwegukana umwanya wa kabiri ku rwego rw’igihugu mu marushanwa yibandaga ku buryo bwo kunoza no guteza imbere imiturire y’icyaro.

Malachie Hakizimana