Twizerimana Bonaventure w’imyaka 26 ni we watorewe kuyobora ishyaka PSD ku rwego rw’akarere, yungirizwa na Mukashyaka Germaine ufite imyaka 19.

Depite Zimurinda Jean Baptiste ushinzwe ibikorwa by’ishyaka PSD mu turere twa Rutsiro na Karongi avuga ko kuba abarwanashyaka ba PSD mu karere ka Rutsiro biganjemo urubyiruko ari umusingi mwiza urimo gutegurwa w’ejo hazaza h’ishyaka.

Yagize ati: “Ntekereza ko urubyiruko ari u Rwanda rw’ejo, noneho rero niba uyu munsi abitabira gahunda z’amashyaka biganjemo urubyiruko, biratanga icyizere cy’u Rwanda rwiza rw’ejo hazaza”.

Depite Zimurinda atanga ingero z’uko muri urwo rubyiruko harimo abadepite b’ejo hazaza, abarimu ndetse n’abayobozi mu nzego za Leta zitandukanye. Ngo bafite n’abarwanashyaka bakuze, ariko gukorana cyane n’urubyiruko ngi ni akarusho kuko ari uburyo bwiza bwo gutegura ahazaza heza h’ishyaka.

Yaboneyeho kandi kwibutsa abarwanashyaka ndetse n’izo nzego zatowe ko umurwanashyaka wa PSD agomba kuba intangarugero muri sosiyete arimo, akubahiriza amahame ya PSD, akubahiriza gahunda za Leta, akazirikana ko agomba no gukorana neza n’izindi nzego ndetse no kubana neza n’abayoboke b’andi mashyaka.

Perezida wa PSD mu ntara y’Uburengerazuba, Hindura Jean Pierre na we yabwiye abarwanashyaka ko batagomba kuba abo ku izina gusa ahubwo ko bagomba no kurangwa n’ibikorwa birimo gutanga umusanzu.

Ati: “ Ishyirahamwe ritungwa n’abanyamuryango baryo, bivuze ko rero ari wowe ugomba gutunga ishyaka atari ishyaka rigomba kugutunga.”

Amatora y’ishyaka PSD mu karere ka Rutsiro yari agizwe n’abarwanashyaka 97 bari baturutse mu mirenge n’utugari dutandukanye tugize ako karere.

Hatowe abagize inzego za PSD ku rwego rw’akarere ari bo perezida, visi perezida, abanyamabanga batatu n’abandi batatu bagize komite nkemurampaka.
Hashyizweho kandi n’abahagarariye ishyaka mu mirenge igize akarere ka Rutsiro.

Malachie Hakizimana