Aba bagororwa baravuga ko byababereye nk’igitangaza kubona u Rwanda rwongera gutekana nyuma ya Jenoside yakorewe Abatutsi, abishe n’abiciwe bakaba babanye neza.

Bakomeza bavuga ko byashobotse kubera ubuyobozi bwiza bwa Perezida Kagame ari na yo mpamvu ngo bifuza ko yakomeza kuyobora u Rwanda.

Bamwe muri abo bagororwa, bakoze Jenoside, bavuga ko bakurikije ibyo bakoze uburyo bafunzwemo bunyuranye n’uko batekerezaga kuko ngo aho bari babona ibyangombwa byose bakenera.

Sinzabakwira Straton, wahoze ari Burugumesitiri wa Komini Karengera akaba umwe muri abo bagororwa bakoze Jenoside, mu izina rya bagenzi be, yavuze ko ibyo byose ari bimwe mu byo bashingira basaba ko Perezida Kagame yakwemererwa kwiyamamaza agakomeza kubayobora.

Akomeza avuga ko ubuyobozi buriho butandukanye kure n’ubwa mbere ya Jenoside kuko ngo nubwo bafunze imiryango yabo ibayeho neza Leta ikaba iyitaho nk’abandi Banyarwanda.

Byongeye kandi, ngo nubwo afunzwe amakuru amugeraho amugaragariza ko igihugu cyateye imbere cyane muri rusange umuntu akaba ashobora koherereza undi amafaranga ari i Rusizi akamusanga i Kigali binyuze muri terefone igendanwa.

Abo bagororwa bemeza ko muri gereza kandi bahabwa ubumenyi butandukanye burimi ubw’imyuga , kujijurana mu bumenyi butandukanye burimo n’indimi, kandi bakanigishwa uburenganzira bwabo.

Umuyobozi wa Gereza ya Rusizi Spt Christophe Rudakubana yavuze ko yatunguwe no kubona abagororwa bandikira Ubuyobozi Bukuru bw’Urwego rw’Igihugu rushinzwe Imfungwa n’Abagororwa (RCS), ngo rubasabire Inteko Ishinga Amategeko kuvugurura Itegeko Nshinga.

Gereza ya Rusizi ibaye gereza ya kabiri aho abagororwa banditse basaba ko Itegeko Nshinga ryavugururwa nyuma y’abagororwa ba Gereza ya Rubavu babisabiye ku wa 2 Kamena 2015 (kanda hano usome iyo nkuru).

Musabwa Euphrem