“Abacuruzi n’abaguzi bagombye gukomeza kugurisha no kugura telefone bishakiye. Ntibagomba gushingira ku matangazo twatanze, kuko uburyo tuzaca izo telefone butarasobanuka”, nk’uko Mutabazi Jean Baptiste, ushinzwe itumanaho n’itangazamakuru muri RURA yasobanuye.

Abacuruzi bari batangiye kugira impungenge ko abakiriya babo bazagabanuka cyangwa bakabacikaho, ariko nyuma yo kumarwa impungenge na RURA, nabo batangarije abaguzi ko batagomba kugira impamvu yababuza kugura za telefone bifuza.

Uwitwa Norbert ucururiza mu mujyi wa Kigali, yavuze ko telefone zanditseho “made in China”, atari inshinwa zose, kandi ko izifite kode zibanzirizwa n’ijambo IMEI hagakurikiraho imibare myinshi nazo zitagomba kwitwa orijinali (original) zose; nk’uko binashimangirwa n’ikigo RURA.

Hari abacuruzi cyangwa abaguzi bumva ko telefone zijyamo udukarita tubiri tw’itumanaho (sim cards) zitujuje ubuziranenge ariko abandi bavuze ko hari n’iza orijinali zijyamo izo ‘sim card’ ebyiri.

Ikigo RURA cyirinze gutanga igihe kizarangiriza inyigo yo guca telefone z’inshinwa no gutangira kubuza icuruzwa ryazo, ariko ngo gifatira urugero ku gihugu cya Kenya cyatanze amezi atandatu kugira ngo zibanze zisaze ku bantu bazikoresha.

RURA yavuze ko itazabangamira abacuruza telefone zitwa inshinwa, baziguze mbere yo gutangaza icibwa ryazo.

RURA izibanda ku kureba amazina y’inganda zikora telefone, niba umucuruzi atanga igihe cyo gusaza kwa telefone agurishije (guarantie), kudashyuha kwayo mu gihe yaba yakoreshejwe cyane, ndetse no kureba ko itava ku murongo w’itumanaho; nk’uko byasobanuwe na Mutabazi wo muri RURA kuri uyu wa kabiri tariki 16/10/2012.

Simon Kamuzinzi