Ni nyuma yo kugeza iki kibazo ku basenateri basuye Akarere ka Kamonyi tariki 2/12/2014, Umuyobozi w’akarere akabemerera ko batazongera kwishyuzwa.

Kuva mu mwaka wa 2009, irimbi riri ahitwa mu Ruyigi mu Kagari ka Gihara mu Murenge wa Runda mu Karere ka Kamonyi ryatangiye gucungwa n’Inkeragutabara, zikajya zishyuza amafaranga y’ u Rwanda ibihumbi 10 ku muntu wese uje kuhashyingura kuko aribo bamucukuriraga imva.

Kwishyuza iri rimbi rishyingurwamo na benshi mu baturage bo mu tugari dutanu tugize Umurenge wa Runda ntibyakiriwe neza n’abaturage kuko bavuga ko babona amafaranga yo kwishyura bibagoye.

Ngo iyo umuntu yapfushije aba akeneye kugura isanduku, igitambaro ndetse n’imodoka yo kumugeza ku irimbi. Iyo hajemo no kugura imva, uwapfushije yiyambaza inshuti n’abavandimwe bakamutwerera ariko icyo gihe akabura ikimuyagira kuko abakamufashije mu mwanya wo gutanga “peteroli” aribo bamufasha kugura imva.

Abaganiriye na Kigali today bavuga ko bafite amatsinda ya “Dutabarane” batangamo amafaranga y’u Rwanda 100 ya buri cyumweru; abafasha kugura isanduku n’igitambaro mu gihe hari upfushije umufasha cyangwa umwana. Ngo ubwo rero kugura imva byavaga mu munani w’uwapfuye.

Muri uyu murenge higeze kugaragara ibibazo by’abantu babura ubushobozi bwo kugura imva bagashyingura ababo mu buryo butabahesha icyubahiro.

Umuyobozi w’Akarere ka Kamonyi, Rutsinda Jacques yatangaje ko inama njyanama yemeje ko buri kagari kazajya kagira irimbi ry’ubuntu, hanyuma umuryango wagize ibyago abaturanyi bakaza bagatunganya imva, bakamuherekeza, noneho hakabaho n’irigurishwa ku rwego rw’imirenge cyangwa rw’akarere, rizajya rishyingurwamo n’ababishoboye.

Marie Josée Uwiringira