Uyu mugabo w’imyaka 37 arubatse akaba afite umugore w’umunyarwandakazi n’abana babiri; umuhungu n’umukobwa. Rushanika Christophe yageze mu Rwanda mu mwaka w’2006, aho yaje ari mu bitaro bya Rutongo ariko ubu asigaye ari umuganga mu karere ka Gicumbi.

Nk’uko abivuga ngo yifuje kuba Umunyarwanda kuva yatangira gukorera mu gihugu cy’u Rwanda. Bimwe mu byamuteye kumva yaba Umunyarwanda ngo harimo no kuba afite umugore w’Umunyarwandakazi.

Avuga ko yiteguye gufatanya n’abandi Banyarwanda kubaka igihugu, cyane cyane mu buvuzi kuko ari umuganga.

Yagize ati “icyatumye nsaba ubwenegihugu harimo kuba igihugu cy’u Rwanda kigendera ku mategeko, gifite imiyoborere myiza, kandi n’abantu bo mu Rwanda mbona ari beza. Ariko icyatumye mbikunda cyane ni uko nashatse umugore w’umunyarwanda.”

Akomeza avuga ko yarushijeho gukunda imico y’abanyarwanda myiza bityo akagira inyota yo kwitwa umunyarwanda.

Nk’uko umushyitsi mukuru muri uyu muhango ari we umuyobozi w’akarere ka Rulindo Kangwagye Justus yabivuze, ngo kuba uyu muturage wo mu karere ka Rulindo ahawe ubwenegihugu bw’ubunyarwanda ni umutungo wiyongereye ku ruhande rw’aka karere ndetse n’igihugu muri rusange kuko umutungo wa mbere mu gihugu ari abaturage bacyo.

Ikindi ngo ni uko igikorwa nk’iki kigaragaza imitangire myiza ya serivise mu gihugu Abanyarwanda bashyize imbere.

Uyu muyobozi akomeza avuga ko ibi bigomba kubera abandi banyamahanga baba mu Rwanda isomo ryo kubona ko Leta y’u Rwanda imvugo ari yo ngiro.

Hortense Munyantore