Mu nama yahuje ba Mutimawurugo bo mu mirenge 17 igize Akarere ka Rulindo kuwa 11/02/2015 bafashe umwanzuro ko guhera tariki ya 19/02/2015 kugeza tariki ya 25/02/2015 bazakora ubukangurambaga bwimbitse mu bikorwa by’isuku mu miryango, harimo kwigisha abagize umuryango gukurungira amazu, ndetse bakanakurungira byibura atatu y’abantu batishoboye cyangwa abafite intege nke muri buri kagari.

Ibi ngo bigomba gushyirwamo imbaraga kuko byagaragaye ko hari abaturage bagituye mu nzu zitameze neza kandi bakeneye ubufasha, bityo nabo bakabasha gutura heza nk’abandi.

Aba bagore bahagarariye abandi mu mirenge kandi baniyemeje gukomeza gushyira imbaraga mu gikorwa batangiye cyo guca nyakatsi yo ku buriri, bisungana mu bimina bagurirana za matora ku batarazibona, bityo nabo bakabasha kuryama heza n’imiryango yabo.

Muri icyo cyumweru kandi ngo hazasurwa ingo zasuwe mu igenzura riheruka gukorwa muri gahunda y’urugo ku rugo bagasanga zifite ikibazo cy’imisarani idatunganye hagamijwe kureba ko umukoro bahawe wo kubaka iyo misarani bawushyize mu bikorwa, bityo abakeneye ubufasha babuhabwe.

Ibikorwa bitenganyijwe gukorwa muri icyo cyumweru, ba Mutimawurugo bazabifashwamo n’inzego zitandukanye zirimo iz’urubyiruko, iz’abagore, ndetse n’inzego z’ubuyobozi guhera ku mudugudu kugera ku Murenge.

Ibyo byose kandi ngo bikazakorwa ari mu rwego rwo kwitegura kwizihiza umunsi mpuzamahanga w’Umugore uzaba ku wa 08/03/2015 imiryango yabo imerewe neza, irangwa n’isuku ku mubiri no mu ngo zabo.

Hortense Munyantore