Aho hose abanyamuryanga ba FPR-Inkotanyi bagiye berekana ibyiza uwo muryango umaze kugeza ku baturarwanda, ariko bakanagereranya n’ubutegetsi bwahozeho mbere y’uko u Rwanda rubohorwa, bwarangwaga n’ivangura, amacakubiri, kudatekerereza Abanyarwanda imishinga yabavana mu bukene n’ibindi.

Kuri ubu ngo hari byinshi byo kwishimira bigaragarira abahisi n’abagenzi. Ibikorwa remezo, nk’amazi, amashanyarazi, imihanda, uburezi n’amavuriro ngo byatejwe imbere mu karere ka Bugesera kandi ntibyahabaga; nk’uko Hakizamungu Laurent, umwe mu banyamuryango yabitanzemo ubuhamya.

Ibyo bikorwa byagezweho ngo ntibigomba gusubira inyuma. Kudasubira inyuma bikazashoboka ari uko buri munyamuryango amenye uruhare rwe, kandi bikazanatozwa abakiri bato nk’uko byasobanuwe na Rwagaju Louis Chairman w’umuryango FPR-Inkotanyi mu karere ka Bugesera.

Yagize ati “tuzaharanira gukomeza kubumbatira iri terambere mu bice byose kandi dushaka ko umuryango uba ipfundo ry’iterambere, ibyo bizagerwaho ari uko abanyamuryango bagomba kubyumva kandi bakabigira ibyabo”.

Ibi birori byagiye byizihirizwa muri buri kagari bikazanizihizwa ku rwego rw’akarere ka Bugesera mu minsi iri imbere.

Si ukwizihiza gusa ariko, hanakozwe ibikorwa byo kuremera amatungo abatishoboye, gushakira amacumbi abatayafite n’ibindi. Ibyo birori byagiye birangwa n’indirimbo, imivugo n’imbyino birata ibyiza Umuryango FPR-Inkotanyi umaze kugeraho.

Egide Kayiranga