Uru rubyiruko rwatangaje ibi mu mahugurwa y’umunsi umwe yabaye kuri iki cyumweru tariki ya 09/03/2014, aho rwigishijwe ibintu byinshi kuri gahunda za Leta, ariko ibiganiro byinshi bikaba byibanze ku iterambere rushishikarizwa kwihangira imirimo.

Uru rubyiruko ruvuga ko runyurwa n’uburyo rwitabwaho, na rwo ngo rwiteguye gukora byinshi biruteza imbere, gusa intego zarwo zikaba kutihererana ibyiza rugenda rugeraho, ahubwo ko rugomba no kwegera rugenzi rwarwo bagafatanya mu bikorwa by’iterambere.

Umutoni ni umunyamabanga wa FPR Inkotanyi mu kagari ka Munini umurenge wa Ruhango, avuga ko muri aya mahugurwa basobanukiwe ko nk’urubyiruko rufite amahirwe menshi yo kwihangira imirimo ndetse rwibumbira mu makoperative, akavuga ko ibyo bigiye aha batazabyihererana, ahubwo ko bagiye kubisangiza bagenzi babo.

Abahagarariye RPF-Inkotanyi mu karere ka Ruhango, bavuga ko mu byo bakora byose batakwibagirwa urubyiruko kuko arirwo mbaraga z’umuryango, ubu bakaba barimo kurufasha guhanga imirimo rwibumbira mu makoperative.

Rusanganwa Theogene visi perezida wa RPF mu karere ka Ruhango, avuga ko urubyiruko arirwo ejo haza h’igihugu, akaba ariyo mpamvu bahora baruteganyiriza amahugurwa kugirango rusobanukirwe n’inzira rwanyuramo yaruteza imbere.

Eric Muvara