Mukamana nta gihe kinini amaze muri aka kazi, ariko ngo mu gihe gito amaze agakora amaze kwigeza kuri byinshi agashimishwa n’uko abigeraho abikesha amaboko bitanyuze mu zindi nzira.

Kuri ubu ngo abasha kwirihirira ubwisungane mu kwivuza ndetse n’umuryango w’iwabo, yatangiye kuvugurura inyubako iwabo babamo, akavuga ko ateganya no kugera ku bindi byinshi dore ko buri munsi atahana amafaranga ibihumbi bitatu.

Uyu mukobwa avuga ko akazi kose nta muntu utagakora yaba umukobwa cyangwa umuhungu, ngo usanga benshi mu bakobwa batinya imirimo y’amaboko, ariko we asanga batakayitinye kuko byose bituruka mu myumvire y’abantu.

Akaba saba abakobwa bagenzi be, kwirinda ibishuko biri hanze akenshi binashora ubuzima bwabo mu kaga, ahubwo bagashimishwa no gutunga ubyavuye mu maboko yabo.

Mukamana avuga ko yaje gukora aka kazi ko mu bucukuzi bw’amabuye y’agaciro, nyuma yo kubona ko ababyeyi be batishoboye, kandi akabona ntaho yakura ibyo akeneye nk’umukobwa.

Akazi k’ubucukuzi bw’amabuye y’agaciro Mukamana akora, abukorera muri sosiyete ya Bleu Change Mining icukura amabuye yo mu bwoko bwa gasegereti.

Umwuga w’ubucukuzi bw’amabuye mu birombe byo mu karere ka Ruhango, usanga wiganjemo abagabo gusa, ariko Mukamana amara impungenge abagore n’abakobwa gutinyuka nabo bakawuzamo kuko ari akazi nk’akandi.

Eric Muvara