Aba bashofeli bavuga ko iyo bumaze kwira bitoroha kubona igare riri mu muhanda kubera ko nta matara amagare afite; ngo hari ubwo uribona bitunguranye hafi no guteza impanuka.

Gasana Emmanuel, atwara moto, avuga ko hari hakwiye gufatwa ingamba z’uko abatwara amagare bajya bashyira ibinyoteli ku magare yabo kandi bakanagira za retorovisire zibafasha kureba inyuma yabo, kuko ngo hari igihe usanga umunyegare akata igare uko yiboneye atarebye inyuma ye, ugasanga bikuruye impanuka.

Uwamuremye Seth ni umunyonzi utwara igare mu mujyi wa Ruhango, avuga ko ibi batabyanze ko ahubwo ikibazo ari ukubibona kuko ibyuma by’amagera bisigaye byarabuze n’ibibonetse bigahenda.

Ubwo komisiyo ya sena y’ububanyen’amahanga ubutwererane n’umutekano yasuraga akarere ka Ruhango hagamijwe kureba umutekano wo mu muhanda tariki 12/12/2014, yasabye ko inzego zibishinzwe gukurikirana iki kibazo, ndetse abanyonzi nabo bagashakisha uko babona ibi binyoteli.

Senateri Jean Damascene Bizimana perezida w’iyi komisiyo, avuga ko byari bikwiye ko igare ryajya rijya gukorera mu muhanda ari uko ryabanje gusuzumwa ko ibi byose biryujuje. Agasaba ubuyobozi n’inzego z’umutekano gufatira ingamba iki kibazo.

Eric Muvara