Mukagatare avuga ko ubuzima bwe bumerewe nabi kuko atagira aho acana ngo atekere abana, kubura aho aca isaso, bikiyongeraho no kubura icyo agaburira abana kuko umwanya wo kujya gushaka ibimutunga n’umuryango we awukoresha mu guha umubyizi umucumbikiye kugira ngo atazamwirukana.

N’ikiniga cyinshi ata amarira, igihe yaganira n’umunyamakuru Dative yagize ati “dore ubu nta mubyizi nkiha, ahubwo nwuha uncumbikiye kugirango mbone ko bwacya kandi birumvikana nawe sinamurenganya kuko igihe anyihanganiye ni kirekire”.

Silas Habakubaho, umuyobozi w’umudugudu wa Nyabihanga Dative atuyemo, avuga ko ikibazo cya Dative bakizi gusa ngo babanje gukemura ibindi bibazo. Habakubaho yemeza ko kwezi kwa 7 uyu mwaka itumba nirirangira bazatangira kumwubakira bafatanyije n’abaturage.

Ikigaragara ni ubuyobozi bw’umudugudu nta buvugizi bwamukoreye muri icyo gihe cyose gishize. Silas Habakubaho, umuyobozi w’umudugudu yagize ati “nta handi ikibazo cya Dative twakigejeje kuko twumvaga tuzakora ibishobo byose tukamwubakira, ariko ubwo mutubwiye ko twamukorera ubuvugizi mu nzego zidukuriye, nibyanga ubwo tuzabikora”.

Dative yari yarashakanye n’umugabo witwa Mugenzi Jean ariko kubera ikibazo cy’ubukene yaramutaye arigendera amusigira abana babiri. Dative avuga ko ataramenya aho uwo bashakanye aherereye.

Eric Muvara